თანასწორობის მოძრაობის ინფორმაციით, სასამართლომ გეი ბიჭს სახლი, რომელიც მამამ სექსუალური ორიენტაციის გამო წაართვა, უკან დაუბრუნა. ორგანიზაციის ინფორმაციით, სასამართლომ მათი სარჩელი ნაწილობრივ დააკმაყოფილა.

"სასამართლომ ბათილად ცნო ჩუქების ხელშეკრულებები, რომლითაც მამამ, როგორც კანონიერმა წარმომადგენელმა, არასრულწლოვანი შვილის სახელზე აღრიცხული ქონება სიძულვილის მოტივით მამამისს აჩუქა. სასამართლომ არ დააკმაყოფილა აღნიშნული ბინიდან მოძალადე მამის და ბაბუის გამოსახლების შესახებ მოთხოვნა, მიუხედავად იმისა, რომ მამის მხრიდან შვილზე ძალადობის არაერთი მტკიცებულება წარვადგინეთ", — აღნიშნავენ ორგანიზაციაში.

მათივე ცნობით, წართმეული ქონება ისევ არასრულწლოვნის სახელზე მას შემდეგ გადაფორმება, რაც სასამართლოს გადაწყვეტილება ძალაში შევა.

თანასწორობის მოძრაობამ 14 თებერვალს განცხადება გაავრცელა, სადაც აღნიშნული იყო, რომ მამამ არასრულწლოვან შვილს სექსუალური ორიენტაციის გამო უძრავი ქონება წაართვა. ორგანიზაციაში აცხადებდნენ, რომ ეს ქონება ბიჭს ბაბუამ ხუთი წლის წინ გადაუფორმა. თანასწორობის მოძრაობამ სარჩელით სასამართლოს მიმართა.

ადვოკატმა, თამარ მჭედლიშვილმა On.ge-ს უთხრა, რომ მოსამართლემ ამ ქონებას ყადაღა დაადო. მისი თქმით, მოსამართლემ მიიჩნია, რომ ყადაღის გამოუყენებლობა გააძნელებდა ან შეუძლებელს გახდიდა გადაწყვეტილების აღსრულებას.