ყოფილმა პრემიერმინისტრმა, ბიძინა ივანიშვილმა, გადაცემაში - შეხვედრები რეგიონულ მედიასთან, განაცხადა, რომ წინა ხელისუფლების დროს არსებული დამნაშავეები ამ ხელისუფლების პირობებში "საკმარისად დაისაჯნენ", ხოლო საზოგადოების უკმაყოფილებას ნაციონალური მოძრაობის საუბარი და აგრესიული გამონათქვამები იწვევს:

"პოლიტიკაში მოსვლის პირველივე დღიდან ვაცხადებდი, რომ ნიურნბერგის პროცესი ალბათ საქართველოში არ უნდა შედგეს და მე ვფიქრობ, რომ არც უნდა შემდგარიყო. ის რომ უკმარისობისა და უკმაყოფილების გრძნობა საზოგადოებაში დარჩა, ამის მიზეზი არა დასჯილთა რაოდენობაა ჩემი აზრით, რომლებიც საკმარისად დაისაჯნენ, არამედ ის, რომ, ნაციონალური მოძრაობა აგრძელებს თავისი მეთოდის შენარჩუნებას. ძალადობა, რაც იყო მათი ძირითადი იარაღი, რაც შერჩათ ინსტრუმენტი საუბრისა და სიცრუის დონეზე, აგრესიული გამონათქვამების დონეზე და თეთრზე შავის მტკიცებას, დღეს ისევ აგრძელებენ და ისევ თავხედურად კრიმინალები მიგვანიშნებენ წესრიგს".

შეხვედრები რეგიონულ მედიასთან - ასე ჰქვია ტელეკომპანია GDS-ის ახალ საარჩევნო პროექტს, რომელშიც ყოფილი პრემიერმინისტრი, ბიძინა ივანიშვილი მონაწილეობს. გადაცემას 20:30-ის ჟურნალისტები ნათია თოიძე და მიხეილ ფეიქრიშვილი უძღვებიან.