"არ მახსოვს, შეიძლება ვთქვი, არ მახსოვს", — მალხაზ მაჩალიკაშვილი სახელმწიფო უსაფრთხოების სამსახურის აუდიოჩანაწერს კიდევ ერთხელ გამოეხმაურა. ის ამბობს, რომ არ მალავს, რომ აინტერესებს მისი მტერი ვინაა.

"მისი ცოცხალიც მაინტერესებს, მისი მკვდარიც მაინტერესებს, მისი შვილიც და შვილიშვილიც, მისი თაობაც, შთამომავალიც და მოდგმაც. არა იმიტომ, რომ გავანადგურო არამედ იმიტომ, რომ ვიცოდე ვინ არის ჩემი მტერი", — განაცხადა მალხაზ მაჩალიკაშვილმა.

მაჩალიკაშვილის თქმით, სუს-ში დაკითხვაზე მივიდოდა, თუ ეცოდინებოდა, რომ ის სავარაუდო ტერაქტის მომზადებას ეხებოდა. ის ამბობს, რომ მზადაა დაკითხვაზე ნებისმიერ დროს მივიდეს.

"ერთი წელია იმაზე მუშაობენ, როგორ გავანადგუროთ ვახა [მალხაზ მაჩალიკაშვილი], როგორ გამოვამწყვდიოთ ციხეში, როგორ გავაჩუმოთ. მე გავიფიქრე, მე მომივიდა ეს აზრი, ბევრჯერ მომდის, მაგრამ მე ამას ისევ ვკლავ ჩემში. ამ ძალას ვნახულობ ჩემში, რადგან ამ საქართველოს მოსახლეობის მხარდაჭერას ვხედავ და არ ვარ ამაზე წამსვლელი", — განუცხადა მაჩალიკაშვილმა ჟურნალისტებს.

7 მაისს სახელმწიფო უსაფრთხოების სამსახურმა ბრიფინგზე განაცხადა, რომ პანკისის სპეცოპერაციის დროს მოკლული თემირლან მაჩალიკაშვილის მამას, მალხაზ მაჩალიკაშვილს ტერორისტული აქტის ორგანიზების გზით რამდენიმე პირის მკვლელობის განზრახვა ჰქონდა. უწყება ამტკიცებს, რომ მაჩალიკაშვილი ტერორისტული აქტის ჩადენას სუს-ის უფროსის ყოფილი მოადგილის, სოსო გოგაშვილის მიმართ აპირებდა.

მოდულის შენობაში დაკითხვაზე იყო მალხაზ მაჩალიკაშვილის ძმისშვილი, მორის მაჩალიკაშვილის, რომელიც სუს-ის მტკიცებით, მალხაზ მაჩალიკაშვილის გეგმის მიხედვით, ჩართული უნდა ყოფილიყო აღნიშნული ტერორისტული აქტის განხორციელებაში. უწყებამ მათი საუბრის ჩანაწერი გაასაჯაროვა.

მაჩალიკაშვილის ყველა ბრალდებას უარყოფს და ამბობს, რომ ამით მისი ოჯახის განადგურებას ცდილობენ. ის ამბობს, რომ კარავში რჩება, ბრძოლას გააგრძელებს და თუ დამნაშავეა, მზადაა დააკავონ.

"თუ მე საშიში ვარ ამ ქვეყნისთვის, თუ მე ტერორისტი ვარ რატომ არ მაკავებენ ამდენი ხანი? 2 თვის წინ სადღაც გამწარების დროს ნათქვამი და ჩაწერილი სიტყვების გამო დღეს ტერორისტს მეძახიან. რატომ არ წამასწრეს დანაშაულზე და არ დამაკავეს, თუ ტერორისტი ვარ? კი მე სულ მაქვს სურვილი გავიგო იმ ადამიანების შესახებ მეტი ვინც შვილი მომიკლეს. მაგრამ ეს დანაშაულის ჩადენაა? არავის გისურვებთ ამ სისასტიკის განცდას, რომელიც მე და ჩემმა ოჯახმა განვიცადეთ. გამწარებული მამის, შვილმოკლული მამის მუდმივი დევნა, თვალთვალი და მისი სიბრაზის დროს ნათქვამი სიტყვების დევნა და გასაჯაროება ეს არის სახელმწიფოს დანიშნულება?! მე მშვიდობიანი და სამართლებრივი ბრძოლის გზიდან არ გადამიხვევია. არც არასდროს გადავუხვევ!" — აცხადებს მალხაზ მაჩალიკაშვილი.

ამავე თემაზე: