გორის სპორტის სასახლის ხელმძღვანელის, ბორის გოგიჩაიშვილის კომპანიამ ქართულ ოცნებას 100 ათასი ლარი შეწირა. გადარიცხვა, აუდიტის სამსახურის მონაცემებით, ორ მაისს მოხდა.

ის ამბობს, რომ ეს თანხა თავისი სურვილით გადარიცხა და არავის დაუძალებია:

"დაძალებები იყო ნაცების დროს, ახლა არის სურვილები".

მისი თქმით, მისი კომპანიის ბრუნვა ყოველწლიურად სამი-ოთხი მილიონი ლარია, თუმცა არ ამხელს მოგება რამდენი აქვს.

გორის მერი, კონსტანტინე თავზარაშვილი ამბობს, რომ ბორის გოგიჩაიშვილი თანამდებობაზე დანიშნა, რადგან როგორც ძველ სპორტსმენს "კარგი საერთაშორისო ურთიერთობები" აქვს. დასაქმებულიც და დასაქმებულიც ამბობენ, რომ სპორტის სასახლიდან ის ანაზღაურებას არ იღებს.

"რა თქმა უნდა, 100 ათასი ლარი [პოლიტიკური ჟესტია], თუ ეს დაძალებით არ არის, როგრც ადრე ხდებოდა ხოლმე", — განმარტა მერმა On.ge-სთვის საუბრისას.