სამტრედიის რაიონულმა სასამართლომ მეუღლისა და მეუღლის მამის განზრახ მკვლელობის მცდელობაში და მუქარაში ბრალდებული დამნაშავედ ცნო.

საქართველოს პროკურატურის მიერ გავრცელებული განცხადებით, 2018 წლის 25 აგვისტოს, მსჯავრდებულმა ურთიერთშელაპარაკების ნიადაგზე, მეუღლის მამას საცხოვრებელი სახლის დაწვით დაემუქრა და სახლის სხვადასხვა ადგილას ნავთი მოასხა, შემდეგ კი განზრახ მოკვლის მიზნით, მეუღლეს გულმკერდის არეში დანით ერთი, ხოლო მეუღლის მამას ორი ჭრილობა მიაყენა. მსჯავრდებულმა განზრახვის სისრულეში მოყვანა ვერ შეძლო, ვინაიდან დაზარალებულებმა ხმაურზე შეკრებილი მეზობლების მეშვეობით გაქცევა მოახერხეს.

სამართალდამცველებმა ბრალდებული იმავე დღეს სამტრედიაში დააკავეს. მას ბრალდება განზრახ მკვლელობის მცდელობას, ორი ან მეტი პირისა და ქონების განადგურების მუქარას ედავებოდა. სამტრედიის რაიონულმა სასამართლომ ის დამნაშავედ ცნო წარდგენილ ბრალდებაში და სასჯელის სახედ და ზომად 17 წლით თავისუფლების აღკვეთა განუსაზღვრა.