საქართველოს პრეზიდენტის ადმინისტრაცია დავით გარეჯში მიმდინარე მოვლენებს გამოეხმაურა, ადმინისტრაციის ხელმძღვანელის ლაშა ჟვანიას თქმით, აუცილებელია საქართველოსა და აზერბაიჯანს შორის საზღვრის დასადგენად კომისიამ მუშაობა გააგრძელოს.

"ეს ფაქტები ცხადყოფს, რომ ჩვენს ქვეყნებს შორის საზღვრის დელიმიტაციის საკითხი არის ძალიან მნიშვნელოვანი, შესაბამისად, აუცილებელია საქართველოსა და ჩვენს მეგობარ აზერბაიჯანის პრეზიდენტებს შორის არსებული შეთანხმებისამებრ, კომისიამ დროულად განაახლოს მუშაობა, რათა ორ მეგობარ ქვეყანას შორის საზღვრები საბოლოოდ დადგინდეს და ასეთ ხელოვნურ დაძაბულობას ადგილი მომავალში აღარ ჰქონდეს", — განაცხადა ლაშა ჟვანიამ.

ლაშა ჟვანიამ ასევე აღნიშნა, რომ ცუდია, როცა ასეთი ფაქტები ხდება, განსაკუთრებით მაშინ, როცა ის აღდგომის დღესასწაულს ემთხვევა.

დავით გარეჯის მამათა მონასტრის არქიმანდრიტმა, კირიონმა მედიასთან თქვა, რომ აზერბაიჯანელმა მესაზღვრეებმა მესამე დღეა უდაბნოს მონასტერი გადაკეტეს და სასულიერო პირებს მონასტერში აღარ უშვებენ. რუსთავი 2-ის ინფორმაციით მესაზღვრეები აღდგომის ტაძრისკენ მიმავალ ახალ ბილიკებს თხრიან. საგარეო საქმეთა სამინისტრომ და საზღვრის დაცვის სამსახურმა ამ საკითხთან დაკავშირებით აზერბაიჯანულ მხარესთან კომუნიკაცია დაიწყო. სამინისტროს ცნობით, აზერბაიჯანელი მესაზღვრეების მხრიდან ქედს მიღმა მთამსვლელი ნაკადის შეიზღუდა.