ელექტრომობილების მეპატრონეებმა რამდენიმე აქციისა და უშედეგო მოლაპარაკებების შემდეგ შიმშილობა დაიწყეს. მათი განცხადებით, აჭარის ავტონომიური რესპუბლიკის თავმჯდომარე თორნიკე რიჟვაძეს შეხვდნენ, რომელსაც შესთავაზეს რეგულაციების დაწესება და უსაფრთხოების ზომების გამკაცრება, თუმცა პასუხად ალტერნატიულ ადგილას მუშაობის შეთავაზება მიიღეს. მათი თქმით, ეს ადგილი არ აწყობთ.

პროტესტის ნიშნად ელექტრომობილების მძღოლებმა ქალაქში მსვლელობა მოაწყვეს.

ფოტო: კადრები ვიდეოდან / იმედი

აქამდე ელექტრომობილების მძღოლებმა თბილისში, მთავრობის კანცელარიასთანაც გამართეს აქციები. ისინი ამბობენ, რომ წლებია სეზონურად ელექტროსკუტერებს აქირავებენ ტურისტებზე, რაც მათი შემოსავლის ძირითადი წყაროა. მათი თქმით, ახალი რეგულაციის შესახებ გაფრთხილებულები არ იყვნენ და მის გადადებას მომავალ წლამდე ითხოვენ.

აქციის მონაწილეებმა ექვსპუნქტიანი გეგმა შეიმუშავეს, რომელიც მათ ბათუმის საკრებულოსაც და აჭარის უმაღლეს საბჭოს შესთავაზეს, თუმცა აღნიშნული გეგმის გათვალისწინებაზე უარი უთხრეს. ისინი პირველ რიგში რეგულაციის ერთი წლით გადადებას ითხოვდნენ. გარდა ამისა, ამბობენ, რომ ელექტრომობილების რაოდენობას 1300-დან 300-მდე შეამცირებენ. მოხმარებიდან ამოიღებენ ე.წ. ორბორბლიან სკუტერებს, სკუტერების სიჩქარეს 20კმ/სთ-მდე შეამცირებენ. ამასთანავე, სკუტერებს არ მიაქირავებენ არასრულწლოვნებსა და ალკოჰოლის ზემოქმედების ქვეშ მყოფ პირებს.

პირველი მაისიდან ბათუმის ბულვარში მოტოციკლით, კვადროციკლითა და ელექტრომობილით გადაადგილება იკრძალება. შესაბამისი გადაწყვეტილება ქალაქის საკრებულომ მიიღო. აკრძალვა ქალაქში არსებულ ყველა პარკსა და სკვერზეც გავრცელდება. იდეა საინიციატივო ჯგუფ ბათუმის ბულვარს ეკუთვნის და მოტივად უსაფრთხო გადაადგილება და ტურისტებისთვის რეკრეაციულ ზონაში უსაფრთხო გარემოს შექმნა სახელდება.