ამერიკის შეერთებული შტატების ელჩის მოვალეობის შემსრულებელმა, როს უილსონმა აღნიშნა, რომ აუცილებელია პარლამენტმა შეასრულოს თავისი კრიტიკული როლი და უზენაესი სასამართლოს მოსამართლეების ნომინაციის პროცესი გამჭვირვალედ წარიმართოს. მან თქვა, რომ გულდაწყვეტილები არიან, რადგან ხელისუფლებამ სრულად არ გაითვალისწინა ვენეციის კომისიისა და სხვა საერთაშორისო ორგანიზაციების რეკომენდაციები.

"მოგეხსენებათ, ბოლოს მიღებულ კანონმდებლობაზე ამასთან დაკავშირებით ცოტა არ იყოს გულდაწყვეტილები ვართ, რადგან არ მოხდა ადეკვატურად და სრულად იმ რეკომენდაციების გათვალისწინება რაც ევროკავშირმა, ევროსაბჭომ, ვენეციის კომისიამ და ასევე ეუთომ გასცა ამ მიმართულებით. ვიმედოვნებთ ამ საკითხებს მომავალში მიაქცევენ ყურადღებას", — განაცხადა როს უილსონმა.

მან მედიასთან საუბრისას ასევე აღნიშნა, რომ ამერიკის შეერთებული შტატები მხარს უჭერს საქართველოს სასამართლო სისტემის განვითარებას, რადგან ეს უზრუნველყოფს მოსახლეობის ნდობას დემოკრატიული ინსტიტუტების მიმართ.

საქართველოს პარლამენტში უზენაესის მოსამართლეთა არჩევის შესახებ ქართული ოცნების მომზადებულ კანონპროექტს კენჭი 19 აპრილს უყარეს და მეორე მოსმენით დაამტკიცეს. ქართულმა ოცნებამ ვენეციის კომისიის დასკვნების ნაწილი გაითვალისწინა, მათ შორის არამოსამართლე წევრებისთვის საკვალიფიკაციო გამოცდის მოხსნა და ინტერესთა კონფლიქტის ნაწილი. მმართველი გუნდის გადაწყვეტილებით, იუსტიციის საბჭოს წევრი, რომელსაც სურს უზენაესის მოსამართლეობა გამოეთიშა მოსამართლეობის კანდიდატების შერჩევის ყველა ეტაპს. უმრავლესობის დეპუტატების ნაწილმა კანონპროექტს მხარი არ დაუჭირა. ქართულმა ოცნებამ არ გაითვალისწინა რეკომენდაცია ფარული კენჭისყრის გაუქმების შესახებ და არც საბჭოს წევრებს ექნებათ გადაწყვეტილების მიღების დასაბუთების ვალდებულება.

ამავე თემაზე: