თბილისის მერმა კახა კალაძემ მსახიობ ლევან ჯიბღაშვილთან დაკავშირებულ კითხვაზე TV პირველის ჟურნალისტს ასე უპასუხა: "დღეს ორიანი დაგიწერეთ, არ ხართ კარგად მომზადებული". თბილისის მერის კომენტარი საზოგადოებრივმა მაუწყებელმა გაავრცელა.

კახა კალაძემ ამგვარად უპასუხა კითხვას, რომელიც გუშინ გავრცელებულ ინფორმაციას ეხებოდა. ამ ინფორმაციით, მსახიობმა ლევან ჯიბღაშვილმა დაკავებისას კახა კალაძის სახელი ახსენა.

პირველი შემთხვევა არ არის, როცა თბილისის მერი კახა კალაძე ჟურნალისტებს აკრიტიკებს. მან პირველ თებერვალს რუსთავი 2-ის ჟურნალისტს შეურაცხყოფა მიაყენა. ჟურნალისტმა კალაძეს ქართული ოცნების ვაკის ოფისიდან ფულის სავარაუდო დაკარგვასთან დაკავშირებით არაერთი დამაზუსტებელი კითხვა დაუსვა. კითხვას, შესაძლებელია თუ არა, რომ დაკარგული თანხის ანაზღაურება თბილისის მერიის ბიუჯეტიდან მომხდარიყო, კალაძემ ბოდიალი უწოდა.