უკრაინის არჩეული პრეზიდენტის, ვოლოდიმიერ ზელენსკის შტაბში ამბობენ, რომ ექს-პრეზიდენტის, ვიქტორ იანუკოვიჩის მილოცვები არ სჭირდებათ.

"მთელი კამპანიის განმავლობაში ზელენსკის გუნდი რუსული პროპაგანდისტული ჯგუფებისგან და ყოფილი უკრაინელი მაღალჩინოსნებისგან ე.წ. მხარდაჭერას იღებდა. ჩვენ ფონს გავალთ როგორც ამ მხარდაჭერის, ისე მათი მოლოცვების გარეშე", — განაცხადა შტაბის ხელმძღვანელმა, დიმიტრი რაზუმკოვმა.

უკრაინიდან გაქცეულმა ყოფილმა პრეზიდენტმა, ვიქტორ იანუკოვიჩმა ვოლოდიმირ ზელენსკის არჩევნებში გამარჯვება მიულოცა. მიმართვაში ყოფილი პრეზიდენტი წერს, რომ ზელენკის "გულწრფელად ულოცავს" და რამდენიმე რჩევა მისცა, მათ შორის აღადგინოს მშვიდობა და კანონის უზენაესობა.

21 აპრილს უკრაინაში საპრეზიდენტო არჩევნების მეორე ტური გაიმართა. ცესკოს წინასწარი შედეგებით, მსახიობმა ვოლოდიმირ ზელენსკიმ 73,15 პროცენტი მოიპოვა, ხოლო მოქმედმა პრეზიდენტმა, პეტრო პოროშენკომ — 24,52. ეგზიტპოლების გამოცხადების შემდეგ პოროშენკომ მარცხი აღიარა და ზელენსკის გამარჯვება მიულოცა. ზელენსკის გამარჯვება უკვე მიულოცეს დასავლეთის ქვეყნების ლიდერებმა, მათ შორის, საქართველოს პრემიერ-მინისტრმა მამუკა ბახტაძემ. რუსეთის ფედერაციიდან ზელენსკისთვის ჯერ არავის მიულოცავს.