პანკისის ხეობაში, სოფელ ბირკიანში ჰესების მოწინააღმდეგე ადგილობრივებსა და პოლიციას შორის მომხდარი დაპირისპირების შემდეგ შსს-მ გამოძიება პოლიციელებზე თავდასხმისა და პოლიციის ტექნიკის დაზიანების მუხლებით დაიწყო. უწყების ცნობით, ჯამში, სამედიცინო დახმარება გაეწია 55 ადამიანს, მათ შორის 38 პოლიციელს და 17 მოქალაქეს. 23 პოლიციელი თელავის საავადმყოფოებში ამ დრომდე რჩება.

გამოძიება საქართველოს სისხლის სამართლის კოდექსის 353¹ და 187-ე მუხლებით მიმდინარეობს, რაც პოლიციელზე თავდასხმას და ცეცხლის წაკიდებით ნივთის დაზიანებას გულისხმობს.

დღეს, 21 აპრილის დილას პანკისის ხეობაში, სოფელ ბირკიანში აქციის მონაწილეებსა და პოლიციას შორის დაპირისპირება მოხდა. სპეცრაზმმა აქციის მონაწილეების წინააღმდეგ ცრემლსადენი გაზი და რეზინის ტყვიები დღის განმავლობაში ორჯერ გამოიყენა. ადგილობრივები ამბობენ, რომ ჰესების, კერძოდ მდინარე ალაზანზე "ხადორი 3"-ის მშენებლობის გაგრძელების უფლებას არავის მისცემენ. მათი თქმით, მშენებლობის შემთვევაში, ხეობის უნიკალური ეკოლოგიური სისტემისა და სოციალური გარემოს დაზიანების მაღალ რისკებია.