დემურ სტურუას თვითმკვლელობამდე მიყვანაში ბრალდებულის, გოდერძი თევზაძის ადვოკატი, ლედი ტუკვაძე აცხადებს, რომ ამ ხნის განმავლობაში, თევზაძის ოჯახზე ფსიქოლოგიური ზეწოლა ხორციელდება, რის გამოც ბრალდებულის 7 წლის შვილის ჯანმრთელობის მდგომარეობა დამძიმდა:

"შეწყდეს მიზანმიმართული ზეწოლები ოჯახზე და მუქარა. ამ ყველაფერმა იმოქმედა მის მცირეწლოვან ბავშვზე, 7 წლის გოგონაზე, რომლის ჯანმრთელობის მდგომარეობა დღეს ძალიან დამძიმდა. ის გადაიყვანეს საავადმყოფოში. დამთავრდეს ერთხელ და სამუდამოდ სასამართლოს გადაწყვეტილების გარეშე ამ ადამიანების დასჯა".

ტუკვაძე დასავლეთ საქართველოს საოლქო პროკურატურას მიმართავს და ყველა იმ პირის მიმართ დაინტერესებისკენ მოუწოდებს, რომლებმაც უდანაშაულობის პრეზუმცია დაარღვიეს და თევზაძეს მკვლელი უწოდეს.

22 წლის დემურ სტურუამ 7 აგვისტოს სამტრედიის რაიონში თავი მოიკლა. გარდაცვლილმა დატოვა წერილი, რომელშიც წერია რომ მასზე ერთ-ერთი პოლიციელი ზეწოლას ახორციელებდა.

სამსახურებრივი უფლებამოსილების ძალადობით გადამეტებისა და თვითმკვლელობამდე მიყვანის ჩადენაში ბრალდებული, ძებნაში მყოფი გოდერძი თევზაძე 13 სექტემბერს ნებაყოფლობით გამოცხადდა საგამოძიებო ორგანოში.

მისი სასამართლო სხდომა 15 სექტემბერს გაიმართა და მოსამართლემ ის წინასწარ პატიმრობაში დატოვა