ზუგდიდის მეექვსე საჯარო სკოლის დირექტორის ია კერზაიას შვილი ბაჩანა შენგელია აცხადებს, რომ სამხარაულის ექსპერტიზის ბიურომ უკვე მეორედ არ გამოყო ექსპერტები. შენგელია ითხოვს ექსპერტიზას, რათა დადგინდეს უკავშირდება თუ არა ია კერზაიას ინსულტი სტრესს. მისივე თქმით, ეს არის დადასტურება, რომ კერზაიას საქმის გამოუძიებლობაში დაინტერესებულია ხელისუფლება.

"გვითხრეს, რომ ჯანდაცვის სამინისტრომ საერთოდ არ გამოუყო სპეციალისტი. შესაბამისად ეს არის კიდევ ერთი დადასტურება იმ ფაქტისა, რომ ია კერზაიას საქმის გაყალბებაში, მისი საქმის გამოუძიებლობაში ჩართულია მთელი სისტემა, მთელი სამთავრობო მანქანა და გუშინდელი პასუხებით კიდევ ერთხელ დავრწმუნდით, რომ ამ საქმის გაყალბებაში ჩართულია სამხარაულის ექსპერტიზის ბიურო", — განაცხადა ბაჩანა შენგელიამ საგანგებო ბრიფინგზე.

შენგელიას უფლებადამცველი ლევან მახარაშვილი კი პროკურატურას გულგრილობაში ადანაშაულებს და აცხადებს, რომ საგამოძიებო უწყება საქმის მასალის გასაცნობად მას შემდეგ დაიბარა, რაც დღევანდელი ბრიფინგი დაანონსდა. ამ წუთებში ბაჩანა შენგელია პროკურორს ხვდება.