საქართველოს პარლამენტის თავმჯდომარემ, ირაკლი კობახიძემ არჩევნებში მოძრაობა დაიცავი საქართველოს შანსები შეაფასა, მიუხედავად იმისა, რომ თავად მოძრაობა პოლიტიკურ აქტივობაზე ჯერ არ საუბრობს. კობახიძის აზრით, ოპოზიციური სპექტრის გაჯანსაღება დემოკრატიის განვითარებას უწყობს ხელს, თუმცა ასეთი სახეებით ვერცერთი პარტია ვერ შეიტანს წვლილს დემოკრატიის განვითარებაში.

"ზოგად საერთო სურათს თუ ნახავთ, ლიდერებს რომლებიც [დაიცავი საქართველოს შეკრებაზე] იყვნენ წარმოდგენილნი აშკარაა, რომ ამ გაერთიანებას ძალიან გაუჭირდება სამპროცენტიანი ბარიერის გადალახვაც კი, როდესაც მინუს პროცენტებით იწყებ სამ პროცენტამდე ასვლა არის ძალიან რთული", — განაცხადა ირაკლი კობახიძე.

პარლამენტის თავმჯდომარემ მედიასთან საუბრისას ასევე აღნიშნა, რომ 3%-იანი ბარიერის პირობებში მაღალია ცდუნება, კონკრეტულმა ადამიანებმა ახალი პარტიები ჩამოაყალიბონ, რადგან მისი გადალახვა უფრო მარტივია.

ქართული ოცნების ყოფილმა მხარდამჭერმა დავით მაღრაძემ მოძრაობა დაიცავი საქართველოს პრეზენტაცია ფილარმონიაში 13 აპრილს გამართა. შეხვედრას სხვადასხვა პოლიტიკური ლიდერები ესწრებოდნენ, მათ შორის ქართული ოცნებიდან წასული დამოუკიდებელი დეპუტატები ეკა ბესელია, გედევან ფოფხაძე, ლევან გოგიჩაიშვილი, ბექა ნაცვლიშვილი, ზვიად კვაჭანტირაძე, ვატო შაქარიშვილი და შენების მოძრაობის ლიდერი დავით უსუფაშვილი.