იურიდიულ საკითხთა კომიტეტის თავმჯდომარის, ანრი ოხანაშვილის თქმით, ქართული ოცნების კეთილი ნება იყო, რომ უზენაესი მოსამართლეების კანონპროექტთან დაკავშირებით ვენეციის კომისიას მიმართეს. ამის შესახებ მან დღეს, 15 აპრილს კომიტეტის სხდომაზე განაცხადა.

კომიტეტის დეპუტატების ნაწილი, ასევე არასამთავრობო ორგანიზაციების წევრები მოითხოვენ, რომ ქართული ოცნების კანონპროექტი უზენაესის მოსამართლეების არჩევის შესახებ ვენეციის კომისიის დასკვნის შემდეგ განიხილონ. როგორც ოპოზიციისთვის, ისე სასამართლოს თემაზე მომუშავე ორგანიზაციებისთვის გაუგებარია, რატომ დაარღვია პირობა ქართულმა ოცნებამ და კანონპროექტის განხილვა ვენეციის კომისიის დასკვნამდე დაიწყო.

იურიდიულ საკითხთა კომიტეტის თავმჯდომარის ანრი ოხანაშვილის განცხადებით, ვენეციის კომისიის დასკვნას ხვალ, 16 აპრილს გამოაქვეყნდება და გამოქვეყნებულ რეკომენდაციებს პლენარული განხილვების დროს გაითვალისწინებენ. ის უარყოფს ბრალდებას, რომ მმართველი გუნდი პროცესის დაჩქარებას ითხოვს.

"სად არის თქვენი ლოგიკა? უხერხულია, ამ პოზიციას რომ აფიქსირებთ. არასამთავრობოებს ჰქონდათ შესაძლებლობა, რომ ყველა ფორმატში ყოფილიყვნენ წარმოდგენილები. გამჭვირვალედ, გახსნილად, საჯაროდ, ყველა დაინტერესებულ პირს ჰქონდა საშუალება, რომ პროცესში ჩართულიყო. დავწერეთ პროექტი, რომელზეც დარწმუნებულები ვართ, რომ არის საუკეთესო პროექტი და არ გვაქვს პრობლემა, რომ გავაცნოთ საერთაშორისო ექსპერტებს და არ გვაქვს იმის შიში, რომ ამ პროექტით პრობლემები შეგვექმნება, რა თქმა უნდა, ჩვენი კეთილი ნება იყო, რომ გადავაგზავნეთ და ვთქვით და დავაანონსეთ და ჩვენ ვიყავით პირველები, ვინც ეს ვთქვით და ახლა გამოდიხართ და ამბობთ, რომ ჩვენ ვჩქარობთ და არ გვინდა ვენეციის კომისიის გადაწყვეტილების გათვალისწინება", — განაცხადა ოხანაშვილმა.

კომიტეტის თავმჯდომარის, ანრი ოხანაშვილის თქმით, რეგლამენტის თანახმად ამ კვირაში კომიტეტი ვეღარ ჩაინიშნებოდა და პროცესი ორი კვირით გადაიდებოდა.

ამავე თემაზე: