საქართველოს პარლამენტის იურიდიულ საკითხთა კომიტეტში მეორე მოსმენით განიხილავენ ქართული ოცნების მიერ შემუშავებულ კანონპროექტს უზენაესი სასამართლოს მოსამართლეების არჩევისა და წარდგენის შესახებ.

შეხვედრას პარლამენტის დეპუტატების გარდა სამოქალაქო სექტორის წარმომადგენლებიც დაესწრებიან, მათ შორის იურისტები გიორგი მშვენიერაძე და სოფო ვერძეული. ისინი კომიტეტზე თავის შენიშვნებს წარადგენენ.

ქართული ოცნების დეპუტატი, გია ვოლსკი დარწმუნებულია, რომ უმრავლესობის მიერ მომზადებულ კანონპროექტს, მოსამართლეთა შერჩევის შესახებ, სამართლებრივად ხარვეზი არ აქვს და ვენეციის კომისია ამას რეკომენდაციებშიც ასახავს. ამის შესახებ მან დღეს, იურიდიულ საკითხთა კომიტეტის დაწყებამდე განაცხადა:

"რეკომენდაციები უნდა ჯდებოდეს იმ ჩარჩოში, რაც არის სტანდარტი და არ უნდა გამოდიოდეს იმ ფორმატიდან, რაც არის სამართლებრივი რეგულაციები. მე დარწმუნებული ვარ და ასეც იქნება, მოწოდებულ კანონპროექტს აბსოლუტურად არანაირი ხინჯი არ გააჩნია. მე დარწმუნებული ვარ, რომ ამას ვენეციის კომისიაც აღიარებს".

საპარლამენტო უმრავლესობის მიერ შემუშავებულ კანონპროექტში წერია, რომ უზენაესი სასამართლოს მოსამართლეობის კანდიდატი შეიძლება იყოს პირი, რომელიც არის მოქმედი ან ყოფილი მოსამართლე და აქვს ჩაბარებული მოსამართლეთა საკვალიფიკაციო გამოცდა. კანდიდატები ღია კონკურსის საფუძველზე შეირჩევიან. კონკურსანტებს აარჩევს იუსტიციის უმაღლესი საბჭო წევრების 2/3-ის თანხმობით, ანუ 15-დან 10 ხმით. საბოლოოდ, პარლამენტში სამუშაო ჯგუფი შეიქმნება, სადაც წარდგენილ კანდიდატებს მოუსმენენ და მის წარსულ საქმიანობასაც შეისწავლიან.

გაიგე მეტი: