ქართული ოცნების პოლიტიკური მდივნის, ირაკლი ღარიბაშვილის განცხადებით, ყველა კვლევით, 19 მაისის შუალედურ არჩევნებში ქართული ოცნება ყველა ოლქში იგებს. ამის შესახებ ღარიბაშვილმა იმედის ეთერში ისაუბრა.

"არ მინდოდა საუბარი კვლევებზე და რეიტინგებზე, მაგრამ მაინც მომიწია, როგორც ჩანს. ყველა წინასწარი კვლევით და რეიტინგით, ყველა ოლქში ჩვენ ვიგებთ. თუ იქნება რომელიმე ოლქში მეორე ტური, არც ეს იქნება პრობლემა. ჩვენ ვაჩვენეთ, რომ გვაქვს ნამდვილი დემოკრატია ქვეყანაში", — თქვა ღარიბაშვილმა.

19 მაისს პარლამენტის შუალედური, მუნიციპალიტეტების მერების რიგგარეშე და საკრებულოების შუალედური არჩევნები გაიმართება. საკრებულოს შუალედური არჩევნები ახმეტის, საგარეჯოს, ჭიათურის, ზესტაფონის, ტყიბულის, წყალტუბოსა და ოზურგეთის მუნიციპალიტეტში გაიმართება. მერის კი — მარნეულში, ზესტაფონში, ჭიათურაში, ზუგდიდსა და ხულოში.

საპრეზიდენტო არჩევნების პირველ ტურში ქართულმა ოცნებამ ეგზიტპოლის შედეგები გამოაქვეყნა, რომლის მიხედვითაც მათი მხარდაჭერილი კანდიდატი, სალომე ზურაბიშვილი პირველ ტურში იმარჯვებდა. თუმცა, ეგზიტპოლის შედეგები არ გამართლდა და არჩევნების მეორე ტური დაინიშნა.