კიმ კარდაშიანს დიდი გეგმები აქვს, თუმცა, მათი წინასწარმეტყველება ამ სტატიის სათაურის წაკითხვამდე გაგიჭირდებოდათ.

ჟურნალ ვოგთან ინტერვიუში, რეალითი შოუს ვარსკვლავი ამბობს, რომ სწავლობს, რათა იურისტი გახდეს. მისი სიტყვებით, გადაწყვეტილება 2018 წელს მიიღო და ტექნიკურ სწავლებას სან-ფრანცისკოს იურიდიულ ფირმაში გადის. მისი მიზანია 2022 წელს იურისტების საერთო გამოცდა ჩააბაროს.

მანამდე კარდაშიანი ჯგუფთან ერთად მუშაობდა კრიმინალური სამართლის რეფორმაზე. თვეების განმავლობაში ის სტუმრობდა ციხეებს, აგზავნიდა პეტიციებს და ესწრებოდა შეხვედრებს თეთრ სახლში.

გასულ წელს, ის თეთრ სახლში დონალდ ტრამპს შეხვდა. ციხის რეფორმასთან ერთად, პრეზიდენტმა განიხილა კარდაშიანის ერთ-ერთი პეტიცია და რამდენიმე დღეში 63 წლის პატიმარი შეიწყალა, რომელსაც ნარკოტიკების მოხმარების გამო მთელი ცხოვრების ციხეში გატარება ჰქონდა მისჯილი.

"თეთრი სახლიდან დამირეკეს და მითხრეს, რომ შეწყალების სისტემის ცვლილებაზე ჩემგან რჩევის მოსმენა სურდათ. ვიჯექი რუზველტის ოთახში. ჩემთან ერთად იყო მოსამართლე, რომელიც კრიმინალებს ციხეში უშვებდა და კიდევ უამრავი გავლენიანი ადამიანი და მე უბრალოდ ვფიქრობდი 'ჯანდაბა, მეტის ცოდნა მჭირდება'", - იხსენებს კარდაშიანი.

კარდაშიანის სიტყვებით, სურს იმ ადამიანებისთვის იბრძოლოს, რომლებიც სისტემის მსხვერპლნი გახდნენ და სწორედ ამიტომ გადაწყვიტა ცოდნის გაღრმავება.

როგორ ისწავლის კანონებს, თუ კოლეჯი არ დაუსრულებია? კალიფორნია, ისევე როგორც აშშ-ს სამი სხვა შტატი, მოქალაქეებს საშუალებას აძლევს გამოცდა კერძო სწავლების შემდეგ ჩააბაროს. გამოცდის წარმატებით ჩაბარების შემთხვევაში, კარდაშიანს კიდევ სამი წელი მოუწევს სწავლა.