ძალოსანი თათია ლორთქიფანიძე ქალთა ნაკრების მწვრთნელს, თემურ ჯანჯღავას სექსუალურ შევიწროებასა და დისკრიმინაციაში ადანაშაულებს. ამის შესახებ თათია ლორთქიფანიძემ საჯაროდ 9 აპრილს გამართულ პრესკონფერენციაზე ისაუბრა.

თათია ლორთქიფანიძის თქმით, 5 აპრილს გახდა ცნობილი, რომ ბათუმში მიმდინარე ევროპის ჩემპიონატზე არ გამოდიოდა. მისი თქმით, ეს ფაქტი ქალთა ნაკრების მთავარი მწვრთნელის პირად ანგარიშსწორებას უკავშირდება.

"რთული სასაუბროა, მაგრამ იყო ტრენერის მხრიდან ძალიან დიდი ზეწოლა ჩემს მიმართ, ორსულობის თემა დამაბრალა, რაც ჩემთვის აღმაშფოთებელი იყო გაურკვეველ ვითარებაში ვიყავი. ერთხელ ოთახში შემოვიდა – "კაცი ხომ არ გინდაო?". ეს ძალიან შეურაცხმყოფელი იყო. ვუთხარი, ოთახიდან გასულიყო", — განაცხადა თათია ლორთქიფანიძემ.

ძალოსანის მამა დიმიტრი ლორთქიფანიძე ამბობს, რომ მიმართავს სამართალდამცავს უწყებებს და ბრძოლას სასამართლოში გააგრძელებს.

"ეს არის ზეწოლა, არა მხოლოდ დისკრიმინაცია, არამედ სექსუალური ხასიათის შევიწროება, რომელსაც ჰქონდა კამპანიური და ორგანიზებული ხასიათი და თათია არა მხოლოდ ექცეოდა დარტყმისა და წნეხის ქვეშ, არამედ მისი მწვრთნელიც. ეს იყო სექსუალური შევიწროება და ასევე დისკრიმინაცია ქალი სპორტსმენის მიმართ. მას არათანაბარ პირობებში აყენებდნენ და იძულებულს ხდიდნენ გარკვეული პირობების ნაცვლად გარკვეული ქმედებები განეხორციელებინა", — უთხრა On.ge-ს დიმიტრი ლორთქიფანიძემ.

ძალოსანთა ფედერაციაში On.ge-ს უთხრეს, რომ ბრალდებებზე კომენტარებს ვერ გააკეთებენ, რადგან ფედერაციაში ამ ეტაპზე მხოლოდ ჩემპიონატსა და მედლებზე ფიქრობენ. დამატებითი განმარტებები მას შემდეგ გაკეთდება, რაც 13 ივნისს ბათუმში მიმდინარე ჩემპიონატი დასრულდება.

მანამდე თათია ლორთქიფანიძის ჩემპიონატიდან მოხსნასთან დაკავშირებით იმედთან განმარტება გააკეთა საქართველოს ძალოსანთა ნაკრების მთავარმა მწვრთნელმა გიორგი ასანიძემ. მისი თქმით, თათია ლორთქიფანიძე ჩემპიონატიდან უპასუხისმგებლობის გამო მოხსნეს.

"ნაკრების უგულებელყოფა, შეკრებებზე არგამოცხადება, თვითნებური მომზადება და არაჯეროვანი მოქცევა, აქედან გამომდინარე ფედერაციის ხელმძღვანელობამ, ამ შემთხვევაში, ის პასუხისმგებელი პირი, რომელიც არის ქალთა ნაკრების უფროსი მწვრთნელი, მიიღო ის გადაწყვეტილება, რაც მიიღო", — განაცხადა ასანიძემ.

დიმიტრი ლორთქიფანიძე კი ფედერაციის პოზიციას "ქვისლების საქმეს" უწოდებს.

"ამ საქმეს აუცილებლად მიეცემა კოდური დასახელება "ქვისლების საქმე" იმიტომ, რომ ეს არის ნეპოტიზმის მაგალითი, რომელსაც გვაძლევს ასანიძისა და ჯანჯღავას ტანდემი. სამწუხაროდ, ფედერაციის პრეზიდენტი, ბატონი კახიაშვილი ამის მაყურებელია. ჩვენ ვგეგმავთ სამართლებრივი გზებით ჩვენი სტატუსის აღდგენასაც და იმ მორალური შეურაცხყოფის გამოსწორებას, რომელიც თათია ლორთქიფანიძემ მიიღო", — განაცხადა ლორთქიფანიძემ.

მათ უკვე გააცნეს საკუთარი პოზიცია სახალხო დამცველს ნინო ლომჯარიას და სარჩელის შეტანასაც გეგმავენ.