მაჟორი დეპუტატობის კანდიდატი შალვა შავგულიძე ქართული ოცნების დამფუძნებლის, ბიძინა ივანიშვილის ბრალდებებს ეხმაურება, რომელიც სააპელაციო სასამართლოში სანდრო გირგვლიანის საქმის გასაჩივრებას ეხება. შალვა შავგულიძე სანდრო გირგვლიანის დედის, ირინა ენუქიძის ადვოკატი იყო.

ბიძინა ივანიშვილმა ტელეკომპანია იმედთან განაცხადა, რომ გირგვლიანის საქმეში დამნაშავე არა მოსამართლე ლევან მურუსიძე, არამედ ადვოკატი შალვა შავგულიძე, რადგან მან საქმეზე საქალაქო სასამართლოს გადაწყვეტილება, სააპელაციოს გამოტოვებით უზენაესში გაასაჩივრა.

პრესკონფერენციაზე შავგულიძემ განაცხადა, რომ მაშინდელი კანონმდებლობით, დაზარალებულს არ შეეძლო მოეთხოვა მსჯავრდებულის ქმედებისთვის უფრო მძიმე კვალიფიკაციის მინიჭება ან საქმის ძიებაში დაბრუნება.

მისივე განმარტებით, მათ შეეძლოთ მსჯავრდებულთათვის არსებული კვალიფიკაციის ფარგლებში შედარებით უფრო მძიმე სასჯელის დაკისრება მოეთხოვათ, რაც მათი მიზანი არ ყოფილა. ის აღნიშნავს, რომ მათი მოთხოვნის დაკმაყოფილების შემთხვევაში გირგვლიანის საქმის წარმოება სააპელაციო ინსტანციაში დასრულდებოდა, შესაბამისად, არც საკასაციო ინსტანციისთვის და არც ევროპული სასამართლოსთვის მიმართვის შესაძლებლობა აღარ ექნებოდათ.

შავგულიძის თქმით, განაჩენის არგასაჩივრების შემთხვევაში ორი ვარიანტი არსებობდა:

"პირველი, თუ სააპელაციო საჩივარს შეიტანდა ან პროკურორი ან რომელიმე მსჯავრდებული, ჩვენ როგორც სუბსიდიური ბრალმდებელი, სრულფასოვნად მივიღებდით მონაწილეობას საქმის სააპელაციო განხილვაში და გვექნებოდა შესაძლებლობა, საჭიროების შემთხვევაში სააპელაციო სასამართლოს განაჩენის საკასაციო ინსტანციაში გაგვესაჩივრებინა. მოვლენები სწორედ ასე განვითარდა. ხოლო იმ შემთხვევაში, თუ არც პროკურორი და არც ერთი მსჯავრდებული პირველი ინსტანციის სასამართლოს განაჩენს არ გაასაჩივრებდა სააპელაციო ინსტანციაში, საქმე ადგილობრივ სამართალწარმოებაში დასრულდებოდა, მაგრამ ჩვენ მაინც გვრჩებოდა შესაძლებლობა, რომ ევროპული კონვენციის მე-13, მე-6 და მე-2 მუხლების დარღვევასთან დაკავშირებით — უფლება ეფექტურ ზომაზე, სამართლიანი სასამართლოს უფლება, სიცოცხლის უფლება — მიგვემართა ევროპული სასამართლოსთვის".

როგორც შავგულიძე ამბობს, რომ პირველ ინსტანციაში განაჩენი არ გაასაჩივრეს, რათა ევროპულ სასამართლოში მიმართვის შესაძლებლობა ჰქონოდათ.