ქართული ოცნების თავმჯდომარე ბიძინა ივანიშვილი ფიქრობს, რომ გირგვლიანის საქმეში დამნაშავე არა მოსამართლე ლევან მურუსიძე, არამედ ადვოკატი შალვა შავგულიძეა, რადგან მან საქმეზე საქალაქო სასამართლოს გადაწყვეტილება, სააპელაციოს გამოტოვებით უზენაესში გაასაჩივრა. ამის შესახებ ბიძინა ივანიშვილმა იმედის ეთერში განაცხადა.

"ყველაზე მაგარ ადვოკატს, რომელიც გმირად გამოცხადდა სასამართლოში, ავიწყდება აპელაციაში შეტანა და აპელაციას წერს პროკურატურა, რომ ერთი წელი დაუმატონ, აპელაცია უარს ამბობს, რომ ერთი წელი დაუმატოს. დღეს შარს სდებენ მურუსიძეს და მას ახსენებენ, რომ გირგვლიანის საქმე პირველ ინსტანციაში დაებრუნებინა, რამეთუ მკვლელობისთვის სასჯელი არ იყო საკმარისი. ამის უფლებაც არ ჰქონდა მურუსიძეს. იცით რატომ? იმიტომ, რომ შავგულიძემ თავის დროზე არ დაწერა აპელაცია", — აცხადებს ივანიშვილი.

მისი თქმით, მაშინ ყველა მოსამართლე იყო მართული და ეშინოდათ მთავარი პროკურორის ზურაბ ადეიშვილის, მაგრამ ამის ფონზეც კი ლევან მურუსიძეს არ ჰქონდა საფუძველი, რომ საქმე სააპელაციოში დაებრუნებინა.

"უკან ვერ დააბრუნებდა, იმიტომ, რომ შავგულიძემ დაარღვია კანონი და არა მურუსიძემ. დღევანდელი შავგულიძის პოზიციას თუ ვნახავთ, ის ნაციონალური მოძრაობის წევრი გახდა, მხარს უჭერენ არჩევნებზე, ევროპული საქართველოა, მაგრამ ეს ერთია ჩემთვის”, – განაცხადა ბიძინა ივანიშვილმა.

ის ფიქრობს, რომ შავგულიძე თამაშის მონაწილე იყო: "ეს არის პარადოქსი, შავგულიძე გმირთან ასოცირდება და მურუსიძე მკვლელთან".

"მურუსიძის გვარი არავის აინტერესებდა, როცა მე შევხვდი პრემიერის რანგში და მოვუწოდე, რომ მოახერხეთ და უარი თქვით ნაციონალური მოძრაობს. როგორც კი ნახეს რომ მურუსიძე აღარ ემორჩილება და ჩინჩალაძე მათ ხელს უწყობს, მაშინ წავიდა მოსამართლეების კრიტიკა", — განაცხადა ივანიშვილმა.