თბილისის მერია მახათას მთაზე ივერიის ყოვლადწმინდა ღვთისმშობლის ხატის სახელობის ტაძრის გარშემოსავლელის აშენებაში 724 866 ლარს დახარჯავს. უწყებამ ტენდერში გამარჯვებული უკვე გამოავლინა და მასთან ხელშეკრულებაც გააფორმა. ამხანაგობა "ალმა-2017"-მა ავანსის სახით თანხის 40 პროცენტი, 289 946 ლარი უკვე მიიღო.

ტენდერთან დაკავშირებით მერიაში On.ge-ს რამდენიმე კვირის წინ განუცხადეს, რომ თბილისის "პროექტის განხორციელება განპირობებულია მახათას მთაზე არსებული ახალი პანთეონის გამართული ფუნქციონირებისთვის".

ეს პირველი შემთხვევა არაა, როცა მერიამ ამ ტაძრის მიმდებარე ტერიტორიის კეთილმოწყობის საქმიანობაში ჩართვა გადაწყვიტა. მაშინ ტაძრის ფილების კეთილმოწყობაში 170 152 ლარის დახარჯვას მერია ასე ხსნიდა:

"საქართველოში, როგორც მართლმადიდებლური ეკლესიის როლისა და მნიშვნელობის გათვალისწინებით, ძალიან დიდი მნიშვნელობა ენიჭება, ახალი ეკლესიებისა და სამონასტრო კომპლექსების მშენებლობას".

საქართველოს მართლმადიდებელი ეკლესიის საპატრიარქო წელსაც, გასული წლების მსგავსად, სახელმწიფო ბიუჯეტიდატნ 25 მილიონ ლარს იღებს.