"ცოტა გაოცებული ვარ, ორი საათია ვსაუბრობთ და სიტყვა რუსეთი არ გაჟღერებულა საერთოდ", — ამ სიტყვებით მიმართა ქართული ოცნების დეპუტატმა, რომან კაკულიამ საქართველოს თავდაცვის მინისტრს, ლევან იზორიას.

დეპუტატი იმედოვნებს, რომ თავდაცვის უწყება არ არის დაკომპლექსებული იმ ძალიან უჩვეულო მოვლენით, რომელსაც ადგილი აქვს საქართველოში.

"ჩვენ ვიცით, რომ არსებობს მკაფიოდ ჩამოყალიბებული რუსული ორიენტაციის ძალა, რომელიც თავისი მიზნით მისაღწევად იყენებს რუსეთის საფრთხეს მომავალში ჩვენი ქვეყნისადმი ნატოსკენ მიმავალ გზაზე", — განაცხადა რომან კაკულიამ.

ის ამბობს, რომ ამის საპირისპიროდ საქართველოში ბევრს აქვს ევროპული ორიენტაცია და მათი მიზანია არ ასოცირდებოდნენ პრორუსულ პოლიტიკოსებთან.

"ცხადია, არ ნიშნავს ეს, რომ საფრთხე არ არსებობს, აქედან გამომდინარე, მნიშვნელოვანია საზოგადოებას ჰქონდეს ინფორმაცია, თქვენ როგორ უყურებთ ამ თემას", — განაცხადა რომან კაკულიამ.

მისივე განცხადებით, ხელისუფლებას ორი ალტერნატივა აქვს:

  1. "ეს საფრთხე არსებობს და ამ საფრთხისგან თავის დაცვის გარანტია არის თქვენი მცდელობები, რაც ჩამოთვალეთ და პლუს საერთაშორისო მხარდაჭერა. ვიღაც გვეტყვის, რომ ეს მხარდაჭერა არასათანადოა, მაგრამ, იდეალურ შემთხვევაში, არის გარანტია, რომ 40 კილომეტრში ტანკები არ იქნებიან თბილისში";
  2. ვიცი, რა ვისთან გვაქვს საქმე ვლადიმერ პუტინის სახით, შეიძლება მათთვის ეს მხარდაჭერა არ იყოს იმ მასშტაბის, რომ ეს საფრთხე ავიცილოთ, მაგრამ არის რა ეს ჩვენი არჩევანი, მზად ვართ ამ გამოწვევის მისაღებად".

რომან კაკულია ფიქრობს, რომ ხელისუფლებას მეორე ალტერნატივასთან აქვს საქმე და თავს იიმედებს, რომ სხვა ალტერნატივაც არსებობს.

"თქვენ რა მოტივით არ ისაუბრეთ ამ გამოწვევაზე? თუ შეიძლება განმარტეთ", — დასვა კითხვა რომან კაკულიამ.