მაისის ბოლოდან ყოველ კვირას თბილისის ზოოპარკი ცხოველების მიღებას დაიწყებს. ზოოპარკს 100-ზე მეტი ცხოველი შეემატება, მათ შორის პინგვინები, ემუები, გნუები, კენგურუები, ფაფრიანი ცხვრები და ა.შ. ამის შესახებ დღეს, 4 მაისს, ზოოპარკის დირექტორმა ზურაბ გურიელიძემ ისაუბრა:

"იქნებიან ის ცხოველებიც, რომლებიც თბილისის ზოოპარკში არასდროს ყოფილან. მაგალითად, დეგუ, ასევე ანტილოპა გნუ, იერუსალიმის ზოოპარკიდან მაიმუნის ორი სახეობა ჩამოვა, ჩამოვლენ კენგურუები, ხალებიანი ირმები".

ზოოპარკის დირექტორის თქმით, ცხოველები თვითმფრინავით პირდაპირ თბილისში ჩამოყვანენ:

"გემით ტრანსპორტირება უფრო იაფი იქნებოდა, თუმცა ვინც ეს თანხები მოაგროვა, მათთვის მნიშვნელოვანი იყო, რომ ცხოველები რაც შეიძლება სწრაფად ჩამოსულიყვნენ თბილისში".

გურიელიძის განმარტებით, თვითმფრინავით მგზავრობა ცხოველებისთვის ნაკლებად სტრესული იქნება და პირველად ის ცხოველები ჩამოვლენ, რომელთა ჩამოსვლისთვის საჭირო საბუთებსაც ქვეყნები მოაწესრიგებენ:

"ეს ცხოველები და მათი ტრანსპორტირება ჩვენთვის საჩუქარია. მაგალითად, პინგვინებს ბრისტოლის მერია აფინანსებს. ევროპის ზოოპარკებმა შეასრულეს ყველაფერი, რასაც საერთაშორისო თანამეგობრობისგან ველოდით. 13 ივნისის შემდეგ მათ თანადგომას ყოველთვის ვგრძნობდით".

ზოოპარკის დირექტორმა ასევე აღნიშნა, რომ პროცესების დროში გაჭიანურება ვოლიერების არქონამაც განაპირობა:

"ჩვენ ეს ყველაფერი აღვადგინეთ. ცხოველები კარგად არიან. რაც გადარჩა, მათთვის ყველანაირი პრობლემები დამთავრდა".

ჟურნალისტებთან შეხვედრისას გურიელიძემ აღნიშნა, რომ ახალი ზოოპარკისთვის გამოყოფილი ტერიტორია შემოღობილია და დაწყებულია დათვებისა და მგლების ვოლიერების მშენებლობა, რომელშიც გერმანიის საერთაშორისო ურთიერთობის სამინისტროც მონაწილეობს:

"ისინი აფინანსებენ პირველ ვოლიერებს თბილისის ზოოპარკში. წესით მათი მშენებლობა პირველ აგვისტოს დასრულებული იქნება. ეტაპობრივად ვაპირებთ ვოლიერების მშენებლობას. მოსაგვარებელია ცხოველების საცხოვებელი პირობებიც, აუცილებელია სხვადასხვა ინფრასტრუქტურული სამუშაოების ჩატარება, ტერიტორიაზე წყლის, კანალიზაციის, გაზის ქონა. რაც შეეხება ტერიტორიის მოწყობას დამთვალიერებლებისთვის, ამისათვის ფინანსები ზოოპარკს არ აქვს".

გურიელიძის თქმით, ახალი ზოოპარკის გასამართად ფინანსურ დახმარებას სახელმწიფოსგან ელოდება. მან დასძინა, რომ 13 ივნისის შემდეგ, ზოოპარკს ფინანსური შემოწირულობა არ მიუღია.

თბილისის ზოოპარკის საზოგადოებასთან ურთიერთობის მენეჯერმა, მზია შარაშიძემ აღნიშნა, რომ 1 ივნისს, ბავშვთა დაცვის საერთაშორისო დღეს, ზოოპარკი ბავშვებისთვის სხვადასხვა გასართობ აქტივობებს გეგმავს, რომლის შესახებ ინფორმაცია ზოოპარკის ფეისბუქის გვერდზე პერიოდულად გამოქვეყნდება .

შარაშიძის თქმით, 13 ივნისს ზოოპარკში სხვადასხვა ღონისძიებებია დაგეგმილია, რომელზე დასწრებაც მოქალაქეებისთვის უფასო იქნება:

"13 ივნისს მოქალაქეები უფასოდ შემოვლენ ზოოპარკში. გვსურს მათ ამ გზით მოკრძალებული მადლობა გადავუხადოთ იმ დახმარებისთვის, რაც მათ ჩვენთვის გაწიეს".

2015 წლის 13 ივნისის წყალდიდობის შემდეგ, თბილისის ზოოლოგიურმა პარკმა ევროპის ზოოპარკისგან საჩუქრად ცხოველების პირველი ნაკადი 19-21 მარტს მიიღო. რიგის ზოოპარკმა საქართველოში 2 თუთიყუში არარაუნა, 3 ალპაკა, 1 აქლემი და 1 აზავერი გამოაგზავნა.