ჯანდაცვის მინისტრი დავით სერგეენკო პოლიტიკური პარტია გირჩის კრიტიკის პასუხად აცხადებს, რომ ნარკოტესტირების საკითხზე არა პოლიტიკოსებმა, არამედ დარგის სპეციალისტებმა უნდა ისაუბრონ. გირჩში მიაჩნიათ, რომ "ამორალურია" საღამოს საათებში კანაფის კანონიერად მოხმარების გამო დილას შემოწმებული ტესტით ადამიანი დასაჯონ. ნარკოტესტი ადგენს მოიხმარა თუ არა პირმა კანაფი ბოლო 8 საათის განმავლობაში.

"ნარჩენი არის თუ ახალმიღებული სისხლში ალკოჰოლის შემცველობა, მას თავისი ფარმაკოლოგიური მოქმედება მაინც აქვს და ამაზე, თუ რა არის დასაშვები კონცენტრაცია, ზოგ ქვეყანაში საერთოდ ნოლი არის, ამაზე მე მჯერა, რომ ნამდვილად სპეციალისტებმა უნდა ისაუბრონ", — აცხადებს მინისტრი პასუხად.

სერგეენკო განმარტავს, რომ ნარკოტესტი შემოწმების მხოლოდ ერთი ეტაპია, რომელიც დაუზუსტებელ, მაგრამ "დასაბუთებულ ეჭვს" აჩენს მოხმარების შესახებ. მისი თქმით, ამის შემდეგ ჩატარდება სპეციალიზებული ტესტი, რომელიც დაადგენს მოიხმარა თუ არა მძღოლმა ნარკოტიკული საშუალება.

პირველ აპრილს ძალაში შედის სისხლის სამართლის კოდექსის 276-ე მუხლი, რომელიც ადგენს, რომ სატრანსპორტო საშუალების მძღოლს ნარკოტიკული, ფსიქოტროპული ან სხვა ახალი ფსიქოაქტიური ნივთიერების ზემოქმედების ქვეშ მართვა ისჯება ჯარიმით ანდა თავისუფლების აღკვეთით ვადით ერთ წლამდე.

გირჩი მოუწოდებს, შსს-ს არ აღასრულოს კანონის ახალი მუხლი კანაფთან მიმართებაში. პარტია ასევე მოუწოდებს პარლამენტს შეცვალოს კანონმდებლობა კონკრეტულად კანაფთან მიმართებაში და გამოიყენოს ალკოჰოლთან მიმართებაში არსებულის იდენტური მიდგომები. მათი თქმით, წინააღმდეგ შემთხვევაში ყველაფერს გააკეთებენ, რომ კანონის ამ მუხლმა ვერ იმუშაოს, აზრი დაკარგოს და ადამიანები არ მოხვდნენ ციხეში იმის გამო, რომ ღამით მეგობრებთან ერთად კანაფი ლეგალურად მოიხმარეს.