იმ პირის ადვოკატი, რომელიც პოლიტიკოსის პირადი ცხოვრების ამსახველი კადრების გავრცელების ბრალდებით დააკავეს, აცხადებს, რომ მისი დაცვის ქვეშ მყოფმა ვიდეო შეტყობინებით მიიღო და ინტერნეტში რეიტინგისთვის ატვირთა. ადვოკატ ლევან დავითაიას თქმით, დაკავებული ბრალს აღიარებს, თუმცა ამბობს, რომ დანაშაული გაუცნობიერებლად ჩაიდინა:

"მას შეტყობინების სახით მიუვიდა ვიდეოფირი. ამას ედავება ამჯერადაც პროკურატურა, რომ მან ნახა ეს შეტყობინება და შესაბამისი ფორმით არ გააკეთა განაცხადი. იმასაც თუ გავითვალისწინებთ, რომ ეს ადამიანი 18 წლისაა, რთულია, მას მოეთხოვებოდეს პოლიციაში განცხადების გაკეთება იმ თემატიკის ირგვლივ, რომელსაც შესაძლოა ვერც აღიქვამდეს დანაშაულებრივად".

ადვოკატის თქმით, YouTube-ზე ატვირთვასთან დაკავშირებით დაკავებულმა "ბავშვური პასუხი" გასცა, რომ იგი სულ ტვირთავდა სხვადასხვა სახის ვიდეოებს "ლაიქების" დასაგროვებლად.

დაკავებულის უფლებადამცველის ინფორმაციით, ვიდეოს გამგზავნი ერთი და იგივე პიროვნებაა, როგორც ამ პირთან, ისე სხვა დაკავებულებთან მიმართებაში:

"ეს არხი, რითაც ვიდეოები ეგზავნებათ, დღემდე არ არის აღკვეთილი".

დღეს, 28 მარტს 18 წლის მირიან მჟავანაძეს შინაგან საქმეთა სამინისტროში ბრალი ოფიციალურად წარუდგინეს, სხვისი პირადი ცხოვრების ვიდეოს გასაჯაროვებისთვის. ამ პოლიტიკოსის პირადი ცხოვრების ამსახველი კადრები ინტერნეტით უკვე რამდენჯერმე გაავრცელეს. შს მინისტრის მოადგილის, ნათია მეზვრიშვილის განცხადებით, შემკვეთი ამ ეტაპზე არ იკვეთება.