"არსებობის ისტორიაში პირველად, სასამართლო ყალიბდება, როგორც ხელისუფლება”, — ასე უპასუხა მოსამართლე ლევან მურუსიძემ სასამართლოში არსებულ ე.წ. კლანთან დაკავშირებით ჟურნალისტის დასმულ კითხვას. მან აღნიშნა, რომ არავითარი კლანი სასამართლო სისტემაში არ არსებობს.

"კლანი დანაშაულთან ასოცირდება. 2012 წლის შემდეგ ამ ე.წ. კლანმა, იუსტიციის საბჭომ და მთლიანად სასამართლო კორპუსმა დადო ისეთი შედეგები, რომელიც არ ჰქონია სასამართლო სისტემას არსებობის ისტორიაში. როგორ შეიძლება კლანი ვუწოდოთ იმას, რომელმაც 11-ჯერ შეამცირა სტრასბურგში საქმეების რაოდენობა. სასამართლო კორპუსმა იგრძნო, რომ არის ხელისუფლება, არის დამოუკიდებელი", — განაცხადა მურუსიძემ.

მისი თქმით, ქართული ოცნების ყოფილი დეპუტატის, ეკა ბესელიას ბრალდება, რომ უზენაესის მოსამართლეთა შერჩევისა და წარდგენის კრიტერიუმები, იუსტიციის საბჭოსთან ერთად დაიწერა, სიცრუეა.

“კანონპროექტი ინიცირებულია პარლამენტის თავმჯდომარის კაბინეტის მიერ, ვერ გეტყვით, რომ ეს არის საბჭოს კანონპროექტი, საბჭოს ჰქონდა თავისი კანონპროექტი. შეადარეთ, ეს ორი კანონპროექტი ერთმანეთთან და ნახავთ, რომ ამას ვერ დაარქმევთ საბჭოს კანონპროექტს”, — განაცხადა მურუსიძემ.

საქართველოს პარლამენტში სასამართლო სისტემის რეფორმის მეოთხე ტალღასთან დაკავშირებულ საკითხებს სამუშაო ჯგუფში განიხილავენ. ამ ჯგუფის საორგანიზაციო შეხვედრა პარლამენტში დღეს, 26 მარტს გაიმართა.