პარტია გირჩის წევრმა ვახტანგ მეგრელიშვილმა გუშინ 2030-ში სტუმრობისას პაატა ბურჭულაძისა და ნიკა გვარამიას საუბარში მის შესახებ გამოთქმულ პრეტენზიებზე განმარტებები გააკეთა.

მისი თქმით, ეს იყო კომიკური სიტუაცია, რომელიც მოხდა იმ საღამოს, როდესაც გაერთიანებულმა ბლოკმა საპარლამენტო სია დაასახელა და გირჩის 15-მდე წევრი შეიკრიბა:

"წავედით ზახარ ზახარიჩში ხინკლის საჭმელად. ხინკალს ველოდებოდით 1 საათის განმავლობაში და 2 წუთის ინტერვალით ტაბულას ჟურნალისტი გვირეკავდა. ჩემთან საუბარი იყო შემდეგი, თუ პარლამენტში ჩვენი გაერთიანება შევიდოდა, ითანამშრომლებდა თუ არა ის ქართულ ოცნებასთან, დასახელებული იყო სხვა პოლიტიკური ძალებიც, მათ შორის ირმა ინაშვილი. კატეგორიულად გამოვრიცხე ეს, რაც სიტყვასიტყვით ტაბულამ გადაწერა, ყველანაირად ვცდილობდი ამეხსნა ჟურნალისტისთვის, რომ ჩემთვის მტერი ამ ქვეყანაში არავინ არ არის".

მეგრელიშვილის თქმით, ის მტერს არ ხედავს არც ნაციონალურ მოძრაობაში და არც ქართულ ოცნებაში, მისი თქმით, მას ჟურნალისტისთვის ამისი ახსნის საშუალება არ ჰქონდა:

"მე დარწმუნებული ვარ ზვიად გამსახურდიას 100 პროცენტიან პატრიოტულ მიზნებში, ის თავსაც შესწირავდა სამშობლოს, მაგრამ მისი ქმედებების შედეგები იყო პრორუსული. ამიტომ, მე ვფიქრობ, რომ იარლიყები კი არ უნდა მივაწეროთ პოლიტიკურ ძალებს, უნდა ვიფიქროთ, რა შედეგებს მოუტანს საქართველოს ესა თუ ის მოქმედება და ეს შედეგი სასარგებლო იქნება ჩვენი მტრისთვის თუ ჩვენი მოყვარისთვის. ასეთი პოზიცია მაქვს მე".

მეგრელიშვილი მიიჩნევს, რომ პოლიტიკოსები პარლამენტში სათანამშრომლოდ უნდა მიდიოდნენ და არასწორია ოპონენტებით მტრის ხატით შექმნა:

"ვითამაშოთ მაშინ რადიკალური და დაუმორჩილებელი ოპოზიციის როლი და თუ ისე არ იქნება, როგორც ჩვენ გვინდა, გამოვალთ რუსთაველზე და დავაბინძურებთ იქაურობას? მე პირადად, მსგავს ქმედებას არ ვაპირებ".

ტაბულას რედაქტორი თამარ ჩერგოლეიშვილი ცოტა ხნის წინ გამოეხმაურა ვახტანგ მეგრელიშვილს და აღნიშნა, რომ აპირებს ჟურნალისტისა და მეგრელიშვილის საუბრის ჩანაწერის გამოქვეყნებას.