ორგანიზაცია სამართლიანი არჩევნების მიერ გამოქვეყნებული დოკუმენტებით, იმ განცხადებების სტილი, ფორმულირებები და ფრაზები, რომელთა საფუძველზეც დაიწყო ნოემბერში სკოლების ინსპექტირებები, მსგავსია. სამი განცხადება დაწერილია 8 ნოემბერს, ხოლო ერთი - 21 ნოემბერს.

ფოტო: ISFED

ფოტო: ISFED

სამართლიანმა არჩევნებმა სამინისტროსგან გამოითხოვა 2016 წლიდან 2019 წლამდე საჯარო სკოლებში განხორციელებული ინსპექტირებების საფუძვლები. სამინისტროში შესული განცხადებები ეხება ზუგდიდის მე-6 (რომლის დირექტორიც ია კერზაია იყო), თბილისის 124-ე, 145-ე და სოფელ ზედა ეწერის საჯარო სკოლებს.

ანგარიშის თანახმად, 2018 წლის 8 ნოემბერს სამინისტროში შესული სამი განცხადების საფუძველზე მინისტრმა იმავე დღეს გამოსცა სამი ბრძანება სამ სკოლაში ინსპექტირების დაწყების თაობაზე, მათ შორის ერთ-ერთი ეხებოდა ზუგდიდის #6 სკოლის ინსპექტირებას:

"რიგ განცხადებებთან დაკავშირებით მათ რეგისტრაციასა და ინსპექტირების დაწყებაზე გამოცემულ ბრძანებას შორის სხვაობა თვეზე მეტიც არის. ასევე, რიგ შემთხვევებში მინისტრის ბრძანება განცხადების რეგისტრაციის მომდევნო დღეს ან რამდენიმე დღის შემდეგაა მიღებული".

8 თებერვალს გამართულ საკომიტეტო მოსმენისას, მინისტრმა მიხეილ ბატიაშვილმა განაცხადა, რომ ზუგდიდის მე-6 საჯარო სკოლაზე საჩივრის წერილის ავტორის ვინაობა მისთვის ცნობილი არაა და "უწყება არც იყო ვალდებული, გაერკვია ეს":

"წერილს აწერია სახელი და გვარი და ჩვენი ვალია რეაგირება. არანაირი რეგულაცია და არანაირი ვალდებულება არ გვაქ დავიწყოთ პერსონის მოძიება".

ია კერზაიას გარდაცვალების საქმე

ზუგდიდის სკოლის დირექტორი, ია კერზაია ინსულტის დიაგნოზით საავადმყოფოში გადაიყვანეს, თუმცა მისი გადარჩენა ვერ მოხერხდა და ის 9 დეკემბერს გარდაიცვალა.

მანამდე ია კერზაია რუსთავი 2-თან ჰყვებოდა, რომ მას შემდეგ რაც არჩევნებში პედაგოგების ჩართვაზე უარი თქვა, ანონიმური წერილის საფუძველზე სკოლაში გენერალური ინსპექციის ორი თანამშრომელი ჩავიდა და სკოლა შეამოწმა. რუსთავი 2-ის ინფორმაციით, შემოწმების დღეს რეგიონს წყალი არ მიეწოდებოდა და სკოლაშიც საპირფარეშოები იყო გაუმართავი. ამ მიზეზის გამო კი თანამდებობიდან დირექტორის გათავისუფლებას აპირებდნენ.

სკოლის დირექტორზე ზეწოლაზე საუბრობენ გარდაცვლილის ოჯახის წევრები და ოპოზიცია. აღნიშნულ საკითხს გამოეხმაურა განათლების, მეცნიერების, კულტურისა და სპორტის მინისტრის მოადგილე ლევან ხარატიშვილი და აღნიშნა, რომ ამ საქმის პოლიტიზირება მიუღებელია.