ადამიანის უფლებათა ევროპულმა სასამართლომ 2006 წელს რუსეთიდან დეპორტირებული საქართველოს მოქალაქეების ინდივიდუალური სარჩელი "ბერძენიშვილი და სხვები რუსეთის წინააღმდეგ" დააკმაყოფილა. სასამართლომ დაადგინა, რომ რუსეთმა საქართველოს თითოეულ მოქალაქეს 2 ათასიდან 15 ათას ევრომდე უნდა გადაუხადოს. გადაწყვეტილებაში ნათქვამია, რომ დეპორტაციის პერიოდში რუსეთმა საქართველოს მოქალაქეების მიმართ ადამიანის უფლებათა კონვენციის სხვადასხვა მუხლი დაარღვია.

ინდივიდუალური სარჩელი საქართველოს 19-მა მოქალაქემ შეიტანა. მათგან 18 უშუალოდ დეპორტაციის მსხვერპლია, ხოლო ერთი არის შვილი, რომლის მამაც სასამართლოს დასრულებამდე გარდაიცვალა.

გადაწყვეტილებაში აღნიშნულია, რომ სასამართლომ კომპენსაციის გადახდის შესახებ გადაწყვეტილება გადადო და დაელოდა დიდ პალატაში ამავე საკითხზე შესულ სხვა საქმეზე გადაწყვეტილების გამოტანას. საუბარია 2019 წლის იანვარში დიდი პალატის გადაწყვეტილებაზე, რომლის მიხედვითაც რუსეთმა საქართველოს მოქალაქეებს 10 მილიონი ევრო უნდა გადაუხადოს. მათივე თქმით, ანალოგიური წესი აღნიშნულ საქმეზეც ამოქმედდება.

სასამართლოს განმარტებით, 2006 წლის ოქტომბერში საქართველოს მოქალაქეები გახდნენ დაკავების, დაპატიმრებისა და გამოძევების ადმინისტრაციული პრაქტიკის მსხვერპლნი რუსეთის ფედერაციის მხრიდან, რა დროსაც შეილახა მათი ფუნდამენტური უფლებები. ევროპულმა სასამართლომ დაადგინა, რომ მომჩივნების მიმართ რუსეთის ფედერაციის მხრიდან ადგილი ჰქონდა კონვენციის მე-3 (წამების აკრძალვა), მე-5 (თავისუფლებისა და ხელშეუხებლობის უფლება), მე-4 ოქმის მე-4 მუხლის (უცხოელთა კოლექტიური გაძევების აკრძალვა) და მე-13 (სამართლებრივი დაცვის ქმედითი საშუალების უფლება) მუხლების დარღვევას.

საქართველოს იმ მოქალაქეებმა, რომლებიც სულ მცირე 48 საათით დააკავეს, კომპენსაციის სახით 10 ათასი ევრო უნდა მიიღონ. 12,500 ევროს მიიღებენ ის მომჩივანეები, რომლებმაც პატიმრობაში 2-დან 10 დღემდე გაატარეს, ხოლო მათ, ვინც 10 დღეზე მეტხანს დააკავეს 15 ათასი ევრო უნდა გადაუხადოს.