"სოციალური მუშაკი შეუცვლელია", "დაუცველთა დაუცველი დამცველი", "სოციალური მუშაკი სუპერმენი არ არის", — ამ და სხვა ბანერებით სოციალური მუშაკები უკეთესი შრომითი პირობებისთვის მთავრობის კანცელარიის წინ საპროტესტო აქციას მართავენ. აქციას შეუერთდნენ სოციალური მუშაკები სხვადასხვა რეგიონიდან.

სოც. მუშაკები მთელი საქართველოს მასშტაბით დღეს, 25 მარტს გაიფიცნენ. ისინი სამუშაო პირობების გაუმჯობესებასა და ბენეფიციარებისთვის ეფექტიანი და მყისიერი მომსახურებების შექმნას ითხოვენ. ერთ-ერთი სოციალურ მუშაკი On.ge-სთან ყვება, რომ ამ აქციას 11 წლის განმავლობაში ელოდა, რადგან სისტემაში ბევრი პრობლემა დაგროვდა.

სოციალური მუშაკები ამბობენ, რომ გაფიცვით ბენეფიციარებისა და საკუთარი პროფესიის დაცვას ცდილობენ. მათივე თქმით, რომ სამინისტრო მათ მნიშვნელობას ვერ აცნობიერებს.

"მოგვეცით უფლება, რომ დავიცვათ ბავშვი, მოგვეცით უფლება, რომ დავიცვათ მოხუცი, მოგვეცით უფლება, რომ დავიცვათ ადამიანი", — განაცხადა აქციის მონაწილემ.

ფოტო: გელა ბოჩიკაშვილი / On.ge

ფოტო: გელა ბოჩიკაშვილი / On.ge

ფოტო: გელა ბოჩიკაშვილი / On.ge

სოც. მუშაკებმა გაფიცვის შესახებ ჯანდაცვის სამინისტროს 21 მარტს აცნობეს, რასაც წინ თვენახევრიანი უშედეგო მედიაცია უძღოდა. მედიაციის პროცესი სოციალურ მუშაკებსა და სამინისტროს შორის თებერვალში დაიწყო. მეურვეობისა და მზრუნველობის სისტემის ძირეული რეფორმის მოთხოვნით სოციალურმა მუშაკებმა პეტიცია შექმნეს. პეტიციით ისინი ჯანდაცვის სამინისტროს, პარლამენტსა და მთავრობას მიმართავენ.

სოციალური მუშაკები ამბობენ, რომ წლების წინ ბავშვთა ზრუნვის სისტემის წარმატებით დაწყებული რეფორმა ვეღარ ფუნქციონირებს და ბავშვთა საუკეთესო ინტერესებს მორგებული არაა.

სოციალური მუშაკების გაფიცვის საპასუხოდ ჯანდაცვის მინისტრმა, დავით სერგეენკომ განაცხადა, რომ სოციალურ დაუცველებს მომსახურებას სამინისტროს სხვა თანამშრომლები გაუწევენ.

ამავე თემაზე: სოციალური მუშაკი — პროფესია, რომლის მნიშვნელობასაც სისტემა ვერ ხვდება