შინაგან საქმეთა მინისტრის, გიორგი გახარიას თქმით, თიბისი ბანკზე კიბერთავდასხმის ლოკაცია იქამდე აღმოაჩინეს, ვიდრე ბიზნესმენ მამუკა ხაზარაძისგან ამის შესახებ წერილს მიიღებდნენ. როგორც მან ჟურნალისტებს პარლამენტში განუცხადა, გამოძიებაც წერილამდე ბევრად უფრო ადრე დაიწყეს. გახარიამ, ასევე, აღნიშნა, რომ კიბერთავდასხმასთან დაკავშირებით დეტალურად "მოგვიანებით" ისაუბრებს.

თიბისი ბანკის დამფუძნებელმა, მამუკა ხაზარაძემ ბანკზე განხორციელებულ კიბერთავდასხმაზე 4 მარტს პარლამენტში გამოსვლის დროს ისაუბრა. მან მაშინ განაცხადა, რომ ბანკის თანამშრომლებმა მიაგნეს ზუსტ მისამართსა და ოთახს, საიდანაც ეს შეტევა განხორციელდა და რომ ეს ადგილი თბილისის ცენტრალურ უბანში მდებარეობდა. მისივე თქმით, ამის შესახებ მათ შინაგან საქმეთა სამინისტროს წერილობით რამდენჯერმე შეატყობინეს.

კიბერთავდასხმასა და ე.წ. ტროლების ფაბრიკასთან დაკავშირებით რუსთავი 2-მა სიუჟეტი 9 მარტს მოამზადა, სადაც აღნიშნული იყო, რომ ყველაფერი თბილისში, რუსთაველის 12-დან იმართებოდა. რამდენიმე დღეში TV პირველმა ოთხი წერილი გაავრცელა, რომელიც მათი მტკიცებით, მამუკა ხაზარაძემ გიორგი გახარიას გაუგზავნა. წერილებში აღნიშნულია, რომ კიბერთავდასხმა თბილისიდან, რუსთაველის 12-დან მოხდა. 17 ივლისით დათარიღებულ პირველ წერილში აღნიშნულია, რომ კიბერთავდასხმა 16 ივლისს მოხდა.

შს მინისტრის მოადგილემ, ნათია მეზვრიშვილმა დაადასტურა, რომ რუსთაველის 12-დან კომპიუტერი ამოიღეს.