ვინც თიბისის მობაილბანკითა და ინტერნეტბანკით სარგებლობთ, შეამჩნევდით, რომ რამდენიმე დღეა აპლიკაციასა და ვებზე ახალი ვიზუალური ფონი გამოჩნდა. ნამუშევარი, რომელსაც ინტერნეტ და მობაილბანკის ნახევარ მილიონზე მეტი მომხმარებელი ყოველდღიურად ნახულობს, გამოჩენილ ქართველ მხატვარს, დავით კაკაბაძეს ეკუთვნის.

თიბისის ინტერნეტ და მობაილბანკში XX საუკუნის ხელოვანის, დავით კაკაბაძის იმერული პეიზაჟების სერიიდან, ნამუშევარს - "წითელ მთას" შეხვდებით.

ფოტო: თიბისი

დავით კაკაბაძე — წითელი მთა

დავით კაკაბაძე — წითელი მთა

ფოტო: დავით კაკაბაძე

მისი ნამუშევრების თიბისის ციფრულ არხებში გამოჩენა მხატვრის 130 წლის იუბილეს უკავშირდება. თიბისი უკვე მრავალი წელია ხელოვნების მხარდამჭერია, რასაც 2017-2018 წლებში პეტრე ოცხელის ნახატების რესტავრაცია და შემდგომ მისი ფართო საზოგადოებისთვის წარდგენაც მოწმობს.

კულტურული და საგანმანათებლო პროექტებით თიბისი მუდმივად ცდილობს მე-20 საუკუნის ისეთი ხელოვანების შემოქმედების გადმოტანას თანამედროვე ხელოვნების კონტექსტში, როგორებიც პეტრე ოცხელი და დავით კაკაბაძე იყვნენ.

თიბისის პროექტებს მუდმივად ახლავს თან საგანმანათლებლო კომპონენტი. სახელოვნებო მემკვიდრეობის აღსაქმელად თანამედროვე ტექნოლოგიების ნოვატორულად გამოყენება განსაკუთრებით მიმზიდველია ახალგაზრდებისთვის, რომლებიც წარსული ეპოქების ექსპონატებს ახალ მედიუმებში უფრო იოლად აფასებენ.

"ჩვენს მიერ მომზადებული საგანმანათლებლო პროგრამები მუდმივად სთავაზობს საზოგადოებას ლექციებს, დისკუსიებს, საუბრებსა და სხვადასხვა ტიპის ღონისძიებებს მაღალი რანგის პროფესიონალების მონაწილეობით.

ამავდროულად, სახელოვნებო პლატფორმა "პროექტი 12" მუდმივად ხელს უწყობს თანამედროვე ხელოვნების განვითარებას. ხელოვანებს აძლევს თვითრეალიზებისა და განათლების შესაძლებლობას, ისე როგორც 2017 წელს პეტრე ოცხელის 110 წლის იუბილეს ფარგლებში 12-მა ახალგაზრდა ხელოვანმა მხატვრის შემოქმედება სხვადასხვა თანამედროვე ფორმით წარმოადგინა.

პროექტის ფარგლებში ქართველ არტისტებს საშუალება ეძლევათ თავიანთი იდეები განახორციელონ და თავიანთი შემოქმედება ფართო აუდიტორიას გააცნონ", - ამბობს პროექტის კურატორი, ნინა ახვლედიანი.

„ჩვენ მუდმივად ვცდილობთ, საგამოფენო დარბაზების გარდა, ალტერნატიულ სივრცეებშიც შევახვედროთ მომხმარებელი და ხელოვნება ერთმანეთს. თიბისის სტრატეგიული მიმართულებაა ციფრული არხების განვითარება და სწორედ ამიტომ დავით კაკაბაძის იუბილეს შესახებ კომუნიკაციაც პირველ ეტაპზე ამ არხებით დავიწყეთ. ინტერნეტ და მობაილ ბანკში დავით კაკაბაძის ნამუშევარი გამოჩნდა, რომელსაც ჩვენი ნახევარ მილიონზე მეტი აქტიური მომხმარებელი ნახავს. დროთა განმავლობაში, ამ ნამუშევარს შევცვლით და მომხმარებლებს მრავალფეროვან და მუდმივად განახლებად ვიზუალებს შევთავაზებთ. საბოლოო ჯამში, ციფრული სივრცე არ იქნება ერთადერთი, სადაც დავით კაკაბაძის შემოქმედებას გავუწევთ პოპულარიზაციას. ამ მიმართულებით კიდევ უფრო მასშტაბურ აქტივობას ვგეგმავთ", - ამბობს გიორგი ვახტანგიშვილი, თიბისის ციფრული ბანკის განვითარების ხელმძღვანელი.

მოდერნისტი მხატვარი დავით კაკაბაძე როგორც ფერწერისა და გრაფიკის, ისე კინოსა და თეატრის მხატვრობის მიმართულებითაც მუშაობდა. ამასთანავე იღებდა ფოტოებს.

იმერულ პეიზაჟებზე მუშაობა მხატვარმა პარიზში გამგზავრებამდე დაიწყო და დაბრუნების შემდეგაც გააგრძელა. იმერეთის პეიზაჟები უშუალოდ აღმოსავლური ფორმებისა და ავანგარდული ხედვის სინთეზს უკავშირდება.

დავით კაკაბაძის ნამუშევრები ოჯახის კოლექციასა და საქართველოს ხელოვნების მუზეუმში ინახება.