გიორგი კვირიკაშვილმა მის მიერ გუშინ გაკეთებული განცხადება იმის შესახებ, რომ აქვს ინფორმაცია, პოლიტიკური ძალის მხრიდან სიტუაციის დაძაბვის მცდელობაზე, დააზუსტა და განაცხადა, რომ ნაციონალური მოძრაობაა ის, ვისაც "სიტუაციის რადიკალიზაცია" სურს.

პრემიერს არ დაუზუსტებია საიდან აქვს ეს ინფორმაცია და დასძინა, რომ მისი გამოქვეყნების ვალდებულება არ გააჩნია.

"არის ინფორმაცია, რომ გარკვეული პოლიტიკური ძალები, არ გვინდა მემგონია, ყველამ თავის თავზე მიიღო და გუშინ დაიწყეს მერე იქ ხუმრობები, აი ეხლა ჩვენ ვაპირებთ ამას და იმას, ეს არის ერთიანი ნაციონალური მოძრაობა, რომლის ინტერესებშიც შედის სიტუაციის რადიკალიზაცია. ეს განცხადება ეყრდნობა კონკრეტულ ინფორმაციას, რომლის გამოქვეყნების ვალდებულებაც მინისტრს არ გააჩნია. ამიტომ ჩვენ ვალდებულები ვართ პრევენციული ხასიათის განცხადება გავაკეთოთ, იმისთვის რომ თავიდან ავიცილოთ სიტუაციის რაიმე კუთხით დაძაბვა".

პრემიერი ასევე მიესალმება შს მინისტრის გადაწყვეტილებას, რეგიონებში პოლიციის მუშაობის საგანგებო რეჟიმზე გადასვლასთან დაკავშირებით.