დიდი ბრიტანეთის პრემიერ-მინისტრმა, ტერეზა მეიმ ევროპის საბჭოს წევრს, დონალდ ტუსკს წერილი გაუგზავნა, სადაც ბრექსიტის გადავადება 29 მარტიდან 30 ივნისისთვის ითხოვა. პარლამენტში გამოსვლისას მეიმ აღნიშნა, რომ უფრო დიდი ხნით ბრექსიტის გადადება არ შეუძლია.

ამავე დროს, ევროკომისიამ განაცხადა, რომ ევროკავშირიდან ბრიტანეთის გასვლის გადავადება "სერიოზულ იურიდიულ და პოლიტიკურ რისკებთან" არის კავშირში.

"ბრექსიტის ვადების გახანგრძლივების ნებისმიერი ვარიანტი, რომელსაც ბრიტანეთი შემოგვთავაზებთ, უნდა დასრულდეს ან 2019 წლის 23 მაისს ან უნდა მოიცავდეს უფრო დიდ ვადებს და ევროკავშირის საპარლამენტო არჩევნები გაითვალისწინოს", — აღნიშნულია განცხადებაში.

დიდმა ბრიტანეთმა ევროკავშირი ფორმალურად 2019 წლის 29 მარტს უნდა დატოვოს, რის შემდეგაც სამწლიანი გარდამავალი პერიოდი დაიწყება. ბრიტანეთის პარლამენტმა ბრექსიტის თარიღის გადადებას მხარი 14 მარტს დაუჭირა. მანამდე კი მან ტერეზა მეის განახლებული გეგმა მეორედ ჩააგდო.

ტერეზა მეის შეთანხმება უკმაყოფილებას იწვევს როგორც ევროსკეპტიკოსებში, ისე ბრექსიტის მხარდამჭერებში. გეგმის მოწინააღმდეგეები ამბობენ, რომ მსგავსი გეგმით დიდი ბრიტანეთი დაზარალდება და ევროკავშირის გავლენა ქვეყანაში შენარჩუნდება.

შეთანხმების ყველაზე საკამათო ნაწილი ჩრდილოეთ ირლანდიისა და ირლანდიის საზღვარს ეხება. ეს არის ერთადერთი სახმელეთო საზღვარი, რომელიც დიდ ბრიტანეთსა და ევროკავშირს აქვთ. ახლა ეს საზღვარი ნომინალურად არსებობს.

ტერეზა მეიც და ევროკავშირიც მიიჩნევენ, რომ ირლანდიის რესპუბლიკასა და ჩრდილოეთ ირლანდიას შორის სრულყოფილი საზღვარი არ უნდა არსებობდეს, რაც პასპორტის კონტროლსა და მკაცრ შემოწმებას გულისხმობს. ბოლო შეთანხმებით, ეს საზღვარი ნომინალური დროებითი იქნება, თუმცა აღნიშნული საკითხი პარლამენტის დეპუტატებს არ მოსწონთ.