გურჯაანის საავადმყოფოში ექიმსა და პაციენტს შორის დაპირისპირება იყო. კონფლიქტის ამსახველი ვიდეო YouTube-ზე გავრცელდა, სადაც ისმის, თუ როგორ სთხოვს პაციენტი ექიმს ჭრილობაზე ხსნარი დაასხას, სანამ სახვევს მოხსნის. ექიმი პასუხობს, რომ "ჭუჭყიანზე არ დაასხამს" მოგვიანებით კი ეუბნება რომ "არაკაცუირად იქცევა" და "ინტრიგანს" უწოდებს.

პაციენტი ხვიჩა სამადაშვილი რუსთავი 2-თან საუბარში იხსენებს, რომ დღეს დილით, 18 მარტს გეგმიური გადახვევისთვის მიაკითხა სამედიცინო დაწესებულებას, ექიმმა კი პროცედურისას ხსნარი არ გამოიყენა:

"მოვიდა ექთანი, ჩამიჭრა ფეხზე [სახვევი] და სტაცა ხელი რომ აეგლიჯა. ხელი წავავლე, რას აკეთებ, რატომ მაგლიჯავ, ჯერ დამისველე, ან მე მომეცი და მე ავიძრობ-მეთქი. უარის თქმის დროს, ამოვიღე ტელეფონი და დავიწყე გადაღება. როცა ტელეფონი გამომტაცა, ჯერ მიყვირა, მეჩხუბა, გაწევ-გამოწევა იყო, მერე კასტილი ავიშვირე. არც მოხვედრია ისე გამოვედი. კარში გამოექანა. სანამ წამოვიდოდი ეს კაცი კიდევ იწევდა, ხალხი ვინც იყო იქ, პაციენტები, იმათმა გააჩერეს".

საავადმყოფოს მენეჯერის თქმით, პაციენტი მითითებებს აძლევდა ექიმს, თუ როგორ უნდა ჩაეტარებინა პროცედურა. მისივე ცნობით, დაზიანებულია საავადმყოფოს ინვენტარი:

"ექიმს მიაყენა არამხოლოდ სიტყვიერი შეურაცხყოფა, არამედ შეეხო ფიზიკურადაც".

On.ge შინაგან საქმეთა სამინისტროდან კომენტარს ელოდება, შევიდა თუ არა შეტყობინება საავადმყოფოში მომხდარი კონფლიქტის შესახებ.