სახელმწიფო აუდიტის ანგარიშის მიხედვით, ქუთაისის ერთ-ერთ ქუჩაზე 2016 წელს გაკეთებული სანიაღვრე სისტემა დაზიანებულია და წყალს არ ატარებს, ბეტონის თავსახურავების ნაწილი კი ჩამტვრეულია. ანგარიშში ნათქვამია, რომ სამუშაოები უხარისხოდ შესრულდა და პროექტის დაგეგმვა/შესრულებაში ხარვეზების გამო მერიამ 168,2 ათას ლარზე მეტი არაეფექტიანად დახარჯა.

როგორც ანგარიშში ვკითხულობთ, ასათიანი ქუჩაზე სანიაღვრე სისტემის რეაბილიტაციისთვის მუნიციპალიტეტმა 2015 წელს 303,9 ათასი ლარის ღირებულების ტენდერი გამოაცხადა. იმის გამო, რომ სანიაღვრე არხების მოწყობამდე მიწისქვეშა კომუნიკაციების მოწყობა იყო აუცილებელი, მერიამ ტენდერში გამარჯვებულ კომპანიასთან ხელშეკრულება შეწყვიტა.

დასკვნაში წერია, რომ მერიამ ერთი წლის შემდეგ სისტემის რეაბილიტაცია გადაწყვიტა და ტენდერის გამოცხადების გარეშე პროექტის შესრულება მის მიერ დაფუძნებულ ა(ა)იპი სპეციალურ სერვისებს დაავალა:

"აღსანიშნავია, რომ 2015 წელს გამოცხადებულ ტენდერში, მერიას მოთხოვნილი ჰქონდა არანაკლებ 408 ათასი ლარის გამოცდილება, ხოლო 2016 წელს იგივე პროექტის შესრულება დაავალა გამოცდილების არ მქონე ა(ა)იპ-ის".

ანგარიშში ვკითხულობთ, რომ მუნიციპალიტეტმა არ იცის სანიაღვრე სისტემის მოწყობისთვის ზუსტად რა თანხა დაიხარჯა. მათივე თქმით, მუნიციპალიტეტს არ ჰქონდა შედგენილი შესრულებული სამუშაოების ხარჯთაღრიცხვა, სადაც პროექტის სრული ღირებულება იქნებოდა დაანგარიშებული.

დოკუმენტის მიხედვით, 168,2 ათასი ლარის არმირებული კონსტრუქციები შეიძინეს.

"გარდა ამისა, პროექტის განსახორციელებლად საჭირო იყო სხვა სამშენებლო მასალები, ტექნიკური და შრომითი რესურსი. აღნიშნული გარემოებების გათვალისწინებით, სანიაღვრე სისტემის მოწყობისათვის დახარჯულია 168,2 ათას ლარზე მნიშვნელოვნად მეტი თანხები", — ნათქვამია სახელმწიფო აუდიტის ანგარიშში.