საქართველოს იუსტიციის მინისტრი თეა წულუკიანი აცხადებს, რომ საქართველოს პრეზიდენტის სალომე ზურაბიშვილის ინიციატივას შეწყალების კომისიის იუსტიციის სამინისტროში გადასვლის შესახებ განიხილავენ.

იუსტიციის მინისტრის თქმით, ჯერ არ არის ცნობილი, შენარჩუნდება თუ არა კომისია, მაგრამ თუკი ის იარსებებს, აუცილებელია, რომ მისი შემადგენლობა პროფესიონალებით დაკომპლექტდეს.

"ვფიქრობთ, რომ თუკი ეს მართლაც მოხდება, ეს დაისაჭიროებს საკანონმდებლო ცვლილებებს, მე არ მაქვს დღეს მზა პასუხი, მოესწრება თუ არა ამ ცვლილების განხორციელება ე.წ. სააღდგომო შეწყალებისთვის, მაგრამ ჩვენ გავაგრძელებთ მუშაობას პრეზიდენტთან, მის ადმინისტრაციასთან იმისთვის, რომ ჩვენ მივიღოთ (თუკი კომისიას შევინარჩუნებთ, ესეც არ არის ცნობილი" ისეთი კომისია, რომელიც პროფესიონალებით არის დაკომპლექტებული. საჭირო იქნება არა მწერლები და მხატვრები, არამედ სოც. მუშაკები, ფსიქოლოგები, პედაგოგები და სხვ", — განაცხადა თეა წულუკიანმა.

პრეზიდენტ სალომე ზურაბიშვილის თქმით, შეწყალების კომისიის გადასვლა იუსტიციის სამინისტროშია გათვალისწინებული.