ტელეკომპანია TV პირველის მფლობელი, ვატო წერეთელი პროკურატურის მიერ გასაჯაროვებულ წერილს აფასებს, როგორც "დამოუკიდებელი და მიუკერძოებელი არხის გაკონტროლების სურვილს". დოკუმენტი თიბისი ბანკის დამფუძნებელმა მამუკა ხაზარაძემ მტკიცებულებად წარადგენა სასამართლოში. ამის შესახებ განცხადებას იგი ფეისბუქის გვერდზე ავრცელებს:

"11 წლის წინანდელ საქმეში, რომლითაც ხაზარაძეს დაუპირისპირდნენ, მოგეხსენებათ, ჩემი კომპანიები და ინიციალებიც ფიგურირებს. მაქვს საფუძვლიანი ეჭვი, რომ სწორედ ამის გამო შეიძლება მოეთხოვათ ხაზარაძისთვის გადმოეცა ჩვენთვის გზავილი TV პირველის სარედაქციო პოლიტიკის შეცვლასთან დაკავშირებით".

საქართველოს მთავარ პროკურატურაში დღეს, 6 თებერვალს ბრიფინგზე თქვეს, რომ თიბისი ბანკის დამფუძნებლის, მამუკა ხაზარაძის ბრალდებას გიორგი გახარიას მიმართ "ამ ეტაპზე ვერ გადაამოწმებენ". ბრიფინგის შემდეგ პროკურატურამ ხაზარაძის მიერ მტკიცებულებად გადაცემული დოკუმენტი გაასაჯაროვა. წერილში საუბარია იმაზე, რომ ტელეკომპანია პირველს იმედის მსგავსი სარედაქციო პოლიტიკა უნდა ჰქონდეს.

"უახლოეს 5 დღეში TV1 უნდა დაჯდეს TV იმედის ტრენდზე, გადავიდეს მაუწყებლობის საგანგებო რეჟიმზე (ეს უნდა დავინახოთ არხის სარედაქციო პოლიტიკიდან)".

პროკურატურის მიერ ფულის გათეთრების მუხლით დაწყებულ გამოძიების საქმეში ავთანდილ და ვატო წერეთლები ფიგურირებენ. პროკურატურის ინფორმაციით, თიბისი ბანკმა იმ კომპანიებზე გასცა 17 მილიონი დოლარის სესხი, რომელმაც თიბისის დამფუძნებელებს მამუკა ხაზარაძესა და ავთო ჯაფარიძეს იგივე თანხა ასესხა.

4 მარტს პარლამენტში მამუკა ხაზარაძემ განაცხადა, რომ არჩევნების წინ შინაგან საქმეთა მინისტრის, გიორგი გახარიასგან მუქარის წერილი მიიღო, რომლის მიხედვითაც, მოთხოვნების შეუსრულებლობის შემთხვეევაში დაუნგრევდნენ რეპუტაციას ქვეყანაში და საერთაშორისო ასპარეზზე.

ბიზნესმენმა აღნიშნა, რომ ამასთან დაკავშირებით პროკურატურა ინფორმირებული იყო. მისი თქმით, გამოძების ნაცვლად, პასუხად მიიღო ბრიფინგი და ბრალდება ფულის გათეთრების საქმეზე. თუმცა, პროკურატურაში ხაზარაძის ბრალდება უარყვეს და განაცხადეს, რომ დაკითხვისას ბიზნესმენმა მუქარა მხოლოდ ეროვნულ ბანკთან მიმართებაში გამოიყენა. უწყებაში განმარტავენ, რომ საუბარია ეროვნული ბანკის ოფიციალურ წერილზე, რომელშიც მამუკა ხაზარაძისა და ბადრი ჯაფარიძის გადადგომის მოთხოვნაზე იყო საუბარი.

თავად შინაგან საქმეთა მინისტრმა ბრალდებები უარყო და განაცხადა, რომ ეს არის "პრივილეგირებული ბიზნესმენის მცდელობა, პარლამენტიდან ჭორაობით იმუნიტეტი მოიპოვოს". მისივე თქმით, საკუთარ სიტყვებზე პასუხის გაცემა ყველას მოუწევდა.

გაიგეთ მეტი: რა ვიცით თიბისის საქმეზე — ყველაფერი მოკლედ