რუსეთთან ურთიერთობის საკითხებში საქართველოს პრემიერ-მინისტრის სპეციალურმა წარმომადგენელმა, ზურაბ აბაშიძემ განაცხადა, რომ ქართულ-რუსული ურთიერთობა ჩიხში შევიდა. მისი თქმით, ოკუპირებულ ტერიტორიებზე ვითარება უფრო და უფრო მძიმდება.

"ამავე დროს ჩვენ ვატარებთ პრაგმატულ პოლიტიკას რუსეთთან, გვაქვს ამ ქვეყანასთან ვაჭრობა, სატრანსპორტო კავშირები, გვაქვს ჰუმანიტარული ურთიერთობები, ტურიზმი. ჩვენ მაქსიმალურად ვცდილობთ, დავუხატოთ რეალური სურათი ჩვენს დასავლელ პარტნიორებს, რაც საქართველო-რუსეთის ურთიერთობებში არსებობს", — განაცხადა აბაშიძემ პარლამენტში გამართული შეხვედრის შემდეგ.

მანვე აღნიშნა, რომ სიტყვები "პროგრესი, წინსვლა და გაუმჯობესება" რუსეთთან ურთიერთობის დასახასიათებლად არასდროს გამოუყენებია.

აბაშიძეს დღეს, 4 მარტს პარლამენტის საგარეო ურთერთობათა კომიტეტის სხდომაზე დახურულ ფორმატში მოუსმინეს. აბაშიძის განცხადებით, შეხვედრა ურთიერთსასარგებლო იყო.

აბაშიძე-კარასინის შეხვედრა და რუსეთის მუქარა

აბაშიძე-კარასინის შეხვედრა პრაღაში 27 თებერვალს გაიმართა. შეხვედრის დაწყებამდე გრიგორი კარასინმა განაცხადა, რომ ქართველი კოლეგა "უსიამოვნო მოულოდნელობებზე" უნდა გააფრთხილოს. შეხვედრის შემდეგ კი მან აღნიშნა, რომ თბილისმა უნდა აირჩიოს ან რეგიონული კეთილდღეობა, ან ევროატლანტიკური კურსი.

"ისინი ნატოსკენ სწრაფვაზე, ევროპული დემოკრატიის ე.წ. რუსულ საფრთხეებზე და მსგავს თემებზე საუბრობენ. ბუნებრივია, ეს გვაწუხებს. ეს რუსეთ-საქართველოს ურთიერთობებს ხელს არ უწყობს", — თქვა კარასინმა.

მისი თქმით, თუ სამხრეთ კავკასიაში ნატოს სამხედრო აქტივობა განვითარდება, ადრე თუ გვიან ეს პრობლემებს მოიტანს. მისივე თქმით, უკრაინაშიც პრობლემები ასე დაიწყო და საქართველოსთან მიმართებაშიც ანალოგიური საკითხი დგას.

აბაშიძემ განაცხადა, რომ კარასინის მუქარა საქართველოსა და უკრაინის მიმართ მიუღებელია. მისი თქმით, ეს სერიოზულ ზიანს აყენებს რუსეთის საერთაშორისო ავტორიტეტს.

პრაღის შეხვედრაზე ზურაბ აბაშიძემ და გრიგორი კარასინმა სავაჭრო-ეკონომიკურ, სატრანსპორტო და ჰუმანიტარულ საკითხები განიხილეს. საუბრის ერთერთი მთავარი თემა საბაჟო მონიტორინგის შესახებ საქართველოსა და რუსეთს შორის 2011 წელს ხელმოწერილი შეთანხმება იყო, რომლის შესრულება, ზურაბ აბაშიძის თქმით, "სუბიექტურ და ობიექტურ" სიძნელეებს აწყდება.