პროკურატურის ყოფილ მაღალჩინოსანს მირზა სუბელიანს თბილისის საქალაქო სასამართლომ ერთი წლითა და ერთი თვით პატიმრობა მიუსაჯა. სასჯელის ათვლა დაკავების დღიდან დაიწყება, შესაბამისად, სუბელიანი საპატიმრო დაწესებულებას ოთხ თვეში დატოვებს. გარდა ამისა, მას ბრალი გადაუკვალიფიცირდა დანაშაულის შეუტყობინებლობიდან დანაშაულის დაფარვაში.

დღევანდელ 4 მარტის სხდომაზე დაცვის მხარემ დასკვნითი სიტყვა წარმოთქვა. ისინი მოითხოვდნენ სუბელიანისთვის ყველაზე მსუბუქი სახის სასჯელს, ჯარიმას, 2 000 ლარის ოდენობით.

დასკვნით სიტყვაში ადვოკატმა, ეკა ხერხეულიძემ აღნიშნა, რომ სუბელიანი დანაშაულს აღიარებს. დაცვის მხარე აპელირებდა სუბელიანის პიროვნულობით, მისი ამჟამინდელი ფსიქოლოგიური და, ასევე, მისი ჯანმრთელობის მდგომარეობით. ბრალდებულმა დასკვნითი სიტყვის წარმოთქმისას მოკლედ თქვა, რომ შეეძლოს, "[მოკლული] ბავშვებისთვის სიცოცხლეს გაცვლიდა".

მირზა სუბელიანი 9 ივნისს დანაშაულის შეუტყობინებლობის ბრალდებით დააკავეს. წარდგენილი ბრალის თანახმად, პირველ დეკემბერს თბილისში, ხორავას ქუჩა #4-ის მიმდებარე ტერიტორიაზე ორი არასრულწლოვნის მკვლელობის შემდეგ მან გაიგო ერთ-ერთი არასრულწლოვნის, გ.ჯ.-ს დანაშაულის შესახებ და არ შეატყობინა სამართალდამცავ ორგანოებს. ადვოკატის თქმით, სუბელიანი ბრალს აღიარებს.

სასამართლომ აღკვეთის ღონისძიებად მას პატიმრობა 10 ივნისს შეუფარდა. 27 თებერვალს კი სასამართლომ ის პატიმრობაში დატოვა.