"არ ვიცოდი თუ არ შეიძლებოდა შეხვედრა, ვინ აკრძალა ან რატო აკრძალა ესეც დღემდე ვერ გავარკვიე", — ასე გამოეხმაურა რუსეთის საკითხებში პრემიერის სპეციალური წარმომადგენელი, ზურაბ აბაშიძე ბიძინა ივანიშვილთან შეხვედრის კრიტიკას.

აბაშიძემ რუსთავი 2-ს უთხრა, რომ ბიძინა ივანიშვილი, როგორც მმართველი პარტიის თავმჯდომარე, აბაშიძე-კარასინის ფორმატთან დაკავშირებით საქმის კურსში უნდა იყოს. მანვე აღნიშნა, რომ აღნიშნული ფორმატი ივანიშვილის პრემიერობის დროს შეიქმნა.

"მე მას შევთავაზე, რომ მიმეწოდებინა ინფორმაცია. ასე, რომ იყო ინფორმაციული სახის შეხვედრა", — აღნიშნა ზურაბ აბაშიძემ.

როგორც მან განმარტა, პრაღიდან ჩამოსვლის შემდეგ ბიძინა ივანიშვილს არ შეხვედრია, თუმცა სიამოვნებით შეხვდებოდა.

ზურაბ აბაშიძე რუსეთის საგარეო საქმეთა მინისტრის მოადგილე გრიგორი კარასინს პრაღაში 27 თებერვალს შეხვდა. როგორც ცნობილი გახდა, პრაღაში გამგზავრებამდე ზურაბ აბაშიძე ბიძინა ივანიშვილს შეხვდა.

პრაღის შეხვედრაზე ზურაბ აბაშიძემ და გრიგორი კარასინმა სავაჭრო-ეკონომიკურ, სატრანსპორტო და ჰუმანიტარულ საკითხები განიხილეს. საუბრის ერთ-ერთი მთავარი თემა საბაჟო მონიტორინგის შესახებ საქართველოსა და რუსეთს შორის 2011 წელს ხელმოწერილი შეთანხმება იყო, რომლის შესრულება, ზურაბ აბაშიძის თქმით, "სუბიექტურ და ობიექტურ" სიძნელეებს აწყდება.

აბაშიძე-კარასინის ფორმატთან დაკავშირებით დღეს, 4 მარტს საგარეო ურთიერთობების კომიტეტში ზურაბ აბაშიძეს მოუსმენენ. პარლამენტში მისი მისვლა ოპოზიციამ მოითხოვა.

ამავე თემაზე: