დადიანების სასახლის ისტორიულ-არქიტექტორულ მუზეუმში, კერძოდ ეკატერინეს სასახლეში ჭერის ნაწილი ჩამოინგრა. 28 თებერვლის შემთხვევის შედეგად რამდენიმე ექსპონატი დაზიანდა.

როგორც კულტურის სამინისტროში On.ge-ს განუცხადეს, ჩამონგრეული ფრაგმენტი მინის თეჯირსა და მაგიდის კიდეს დაეცა, რომელზეც ექსპოზიციის სახით საიმპერატორო მანუფაქტურებში დამზადებული, დადიანების ფაიფურის სერვიზი იყო განლაგებული. ჭერის ნაწილმა სერვიზის რამდენიმე ელემენტი დააზიანა. მუზეუმის დირექტორის განმარტებით, ყველა დაზიანებული ნივთი, სავარაუდოდ, რესტავრაციას დაექვემდებარება.

სამინისტროში ამბობენ, რომ დღეს, პირველ მარტს მუზეუმში კულტურული მემკვიდრეობის სამმართველოს უფროსი, ეროვნული მუზეუმის რესტავრატორები და კულტურული მემკვიდრეობის დაცვის ეროვნული სააგენტოს სპეციალისტები გაემგზავრნენ. დაზიანებულ ნივთებს რესტავრაციისთვის ეროვნულ მუზეუმში გადმოიტანენ.