ვიეტნამის ქალაქ ჰანოეში აშშ-ს პრეზიდენტის, დონალდ ტრამპისა და ჩრდილოეთ კორეის ლიდერი, კიმ ჩენ ინის მეორე სამიტის დაწყებას ელოდებიან. ვიეტნამის სამიტზე მხარეები ისევ ჩრდილოეთ კორეის ბირთვულ განიარაღებაზე იმსჯელებენ. თუმცა მოსალოდნელია, რომ ამჯერად განიარაღების კონკრეტული გეგმა გაიწერება.

კიმ ჩენ ინთან შეხვედრამდე დონალდ ტრამპი ვიეტნამის პრემიერ-მინისტრსა და სხვა პოლიტიკოსებს შეხვდა. ტრამპმა დატვიტა, რომ ვიეტნამი ვითარდება და ჩრდილოეთ კორეაც ამ გზას დაადგება თუ ბირთვულ იარაღზე უარს იტყვის.

"გასაოცარი პოტენციალია", — წერს პრეზიდენტი.

რაც შეეხება კორეის ნახევარკუნძულის დენუკლეარიზაციას ტრამპი ამბობს, რომ არავის დაჩქარება არ სურს:

როგორია განრიგი

განრიგის მიხედვით, ტრამპი და კიმ ჩენ ინი ერთმანეთს 27 თებერვალს ადგილობრივი დროით 18:40 საათზე სასტუმრო მეტროპოლში შეხვდებიან და 20-წუთიან პირად შეხვედრას გამართავენ. ამის შემდეგ კი დელეგაციის წევრები ერთად ივახშმებენ.

გარდა ამისა, ორივე ქვეყნის ლიდერები შეხვედრას გამართავს 28 თებერვალს, ხუთშაბათსაც, თუმცა მათი ზუსტი განრიგი ჯერ უცნობია. თუმცა მოსალოდნელია, რომ პრესკონფერენცია და დოკუმენტების ხელმოწერა ხუთშაბათს დღის მეორე ნახევარში იქნება.

რატომ ვიეტნამი

დონალდ ტრამპი ვიეტნამში სამიტამდე ერთი დღით ადრე 26 თებერვალს ჩაფრინდა. კიმ ჩენ ინმა კი ჰანოეში ჩასვლა ტრადიციული მეთოდით, მატარებლით გადაწყვიტა და გზაში თითქმის სამი დღე იყო.

თავის მხრივ ვიეტნამი სამიტისთვის იდეალური ადგილია, რადგან ქვეყანას დიპლომატიური ურთიერთობები აქვს როგორც აშშ-სთან, ისე ჩრდილოეთ კორეასთან. წარსულში აშშ-ს მტერი ვიეტნამი ახლა მისი მეგობარია, რაც შტატებს შეუძლიათ იმის მაგალითად გამოიყენონ, თუ როგორია მეგობრობა წარსული წყენების მიუხედავად.

ფოტო: Wallace Woon / EPA