ეკა ბესელიას თქმით, პარტიიდან წამოსვლის წინ მას ჰქონდა შეთავაზებები იმისთვის, რომ დარჩენილიყო. ამის შესახებ მან გადაცემა არჩევანში ისაუბრა. წამყვანის კითხვაზე, ჰქონდა თუ არa მას შეთავაზება პარტიის თავმჯდომარის, ბიძინა ივანიშვილისგან, ასე პასუხობს: "აბა ახლა ვანო ზარდიაშვილი შემომთავაზებდა?!"

ბესელია არ აკონკრეტებს რა შესთავაზეს დარჩენის სანაცვლოდ, თუმცა ამბობს, რომ ბევრად უკეთესი არჩევანი ჰქონდა და თუ მოინდომებდა, სიტუაციას გაიუმჯობესებდა. მისი თქმით, ეს თემა დახურულად უნდა დარჩეს.

"ნუ დამიჯრებთ. თვალებში ხომ მიყურებთ, ჩემი მაყურებელიც ხომ მიყურებს თვალებში, მან გადაწყვიტოს დაიჯეროს თუ არა ეკა ბესელიასი", — განაცხადა მან.

ეკა ბესელიამ ქართული ოცნება და საპარლამენტო უმრავლესობა 4 დღის წინ დატოვა. დეპუტატმა წასვლის რამდენიმე მიზეზი დაასახელა. მათ შორის იყო მოსამართეთა უვადოდ დანიშვნის დროებით შეჩერებისა და ბოკერია-სააკაშვილის რეჟიმის დანაშაულებრივად გამოცხადების კანონპროექტების ჩაგდება პარლამენტში.

ქართულ ოცნებაში დაპირისპირების მიზეზი სწორედ მოსამართლეების დანიშვნის საკითხი გახდა. ბესელიამ განაცხადა, რომ იურიდიული კომიტეტის თავმჯდომარის თანამდებობა ამ მიზეზით დატოვა. პარლამენტის თავმჯდომარე ირაკლი კობახიძე კი ამ ფაქტს უარყოფდა. კობახიძის თქმით, ბესელიას ვიცე-სპიკერის თანამდებობა შესთავაზეს. ამის შესახებ მან იმ ოთახის წინ ისაუბრა, რომელსაც მისი თქმით, ბესელიასთვის არემონტებდნენ.

ბიძინა ივანიშვილმა განაცხადა, რომ ბესელიამ ვიცე-სპიკერად დანიშვნის შეთავაზება არასწორად დაუკავშირა უზენაესი სასამართლოს მოსამართლეების არჩევის პროცესს. მისი განმარტებით, პარლამენტის თავმჯდომარის მოადგილედ ბესელიას არჩევის საკითხი დღის წესრიგიდან მალევე მოიხსნა.