23 თებერვალს, მამულის მცველთა ანუ საბჭოთა კავშირის არმიის დღეს რუსეთში, წმინდა ისააკის ტაძარში სანქტ-პეტერბურგის მუსიკალურმა გუნდმა ამერიკის ატომურ დაბომბვაზე ბალადა იმღერა. სიმღერას, სადაც დეტალურად არის მოყოლილი როგორ უნდა "დაიწვას ამერიკის მიწა" მაყურებელი ოვაციებით შეხვდა.

სიმღერის ტექსტში მთხრობელი ამბობს, რომ წყალქვეშა ნავს ათეულობით ატომური ბომბი გადააქვს, რომლითაც ვაშინგტონი უნდა დაიბომბოს.

"ტრუ ლა, ლა, ტრუ ლა, ლა
ყველაფერს ვიყიდი სამ რუბლად!
შენ დაიწვი, დაიწვი არამოძმის მიწავ!"

სტროფი სიმღერაში არაერთხელ მეორდება. იქვე აღნიშნულია, რომ ამერიკა 500 წლის წინ ტყუილად აღმოაჩინეს. გარდა ამისა, ტექსტში ამერიკის შავკანიანი მაცხოვრებლები რასისტულად არიან მოხსენებული.

BBC-ის რუსული ბიუროსთან ინტერვიუში, სიმღერის ავტორმა ანდრეი კოზლოვსკიმ განაცხადა, რომ ტექსტი 1979-80 წლებში დაწერა, როცა ლენინგრადის სამხედრო სასწავლებელში სწავლობდა.

"ამ იუმორისტული სიმღერისთვის პირველადაც საკმარისად დავისაჯე, ახლა მეორედ ვისჯები. პირველ ჯერზე იმისთვის, რომ სატირული სამხედრო სიმღერა დავწერე, ახლა კი იმისთვის, რომ სიმღერას პროპაგანდისტული შინაარსი აქვს", — განუცხადა მან BBC-ს.

ვლადიმირ ბელცოვი, რომელმაც საკუთარი გუნდი საბჭოთა არმიის დღეს ამ სიმღერით წარადგინა აცხადებს, რომ ეს ტექსტი ხუმრობა იყო და არანაირი პოლიტიკური კონტექსტი არ ჰქონია.

1922 წლიდან 23 თებერვალი წითელი არმიის დღედ აღინიშნებოდა. 1964 წლიდან მას საბჭოთა არმიის დღე დაერქვა, 1992 წლამდე საბჭოთა არმიისა და საზღვარო ფლოტის დღეს ეძახდნენ. საბჭოთა კავშირის დაშლის შემდეგ დსთ-ს ქვეყნებში 23 თებერვალს შეცდომით კაცების დღესაც უწოდებდნენ, თუმცა რუსეთში მას მამულის მცველთა დღეს უწოდებენ.

ეს პირველი შემთხვევა არ არის, როცა ამერიკის დაბომბვა კონცერტის ერთ-ერთ თემად იქცა. 2017 წელს ჩრდილოეთ კორეაში გამართული კონცერტის დასასრულს ეკრანზე აშშ-ის დაბომბვის იმიტირებული კადრები გაუშვეს.