პარტია ქართული ოცნება არჩევნებში გამარჯვების შემთხვევაში, ჯანდაცვის კუთხით, ამომრჩეველს საყოველთაო ჯანდაცვის სისტემის შენარჩუნებას ჰპირდება. მათი წინასაარჩევნო პროგრამით გათვალისწინებულია, რომ გაუმჯობესდება საყოველთაო ჯანდაცვის სერვისებისა და მედიკამენტების ხელმისაწვდომობა მოწყვლადი ჯგუფებისთვის და პენსიონერებისთვის.

ქართული ოცნება გეგმავს, რომ გაზარდოს პირველადი ჯანდაცვის სისტემის დაფინანსების მოცულობა. ასევე, მათივე დაპირებით, გაიზრდება ჯანდაცვის სპეციალიზებული მიმართულებების პროგრამული დაფინანსება, მათ შორის C-ჰეპატიტის ელიმინაციის პროგრამაში ჩართვის საშუალება მომავალშიც ექნება ყველა პაციენტს.

წინასაარჩევო დაპირების თანახმად, გაუმჯობესდება ფსიქიკური ჯანმრთელობის პროგრამის მოცულობა და ხარისხი, როგორც სტაციონარულ, ისე ამბულატორიულ და თემზე დაფუძნებული სერვისების დონეზე.

ქართული ოცნება აცხადებს, რომ მათი გამარჯვების შემთხვევაში:

• გაგრძელდება აცრების ეროვნული კალენდრით ბავშვთა
  იმუნიზაციის პროგრამა;
• საფუძველი ჩაეყრება ონკოლოგიური დაავადებების მკურნალობის თანამედროვე და მაღალეფექტურ მეთოდებს, როგორიცაა ადრონული თერაპია და ღეროვანი უჯრედების გადანერგვა.

ჯანდაცვის სისტემის დაფინანსების მხრივ, ქართული ოცნება აპირებს, რომ საყოველთაო ჯანდაცვის სტანდარტული პაკეტი დახვეწოს და დამატებითი მომსახურების გაწევის უფლება კერძო სადაზღვევო კომპანიებს დაუტოვოს.

რაც შეეხება მედიკამენტებზე ხელმისაწვდომობის გაზრდას, ქართული ოცნება აცხადებს, რომ სისტემურ რეფორმას განახორციელებს. მათი გეგმით, სახელმწიფო შეისყიდის სტრატეგიულ მედიკამენტებს, მეორე მხრივ კი დაინერგება წამლის ხარისხის კონტროლი.

ჯანდაცვის რეფორმასთან ერთად, ქართული ოცნება გეგმავს, რომ არსებული სოციალური დაცვის პროგრამაც დახვეწოს, ისე რომ გამოირიცხოს სუბიექტური ფაქტორები. მათი თქმით, ამ მხრივ გამკაცრდება მონიტორინგი.

ამას გარდა, ქართული ოცნების წინასაარჩევნო პროგრამაში ვკითხულობთ, რომ მოხდება სასჯელის ლიბერალიზაცია მსუბუქი ნარკოტიკების მოხმარებასთან მიმართებით. მათივე დაპირებით, სახელმწიფო გააუმჯობესებს ნარკოდამოკიდებული პირებისათვის ჯანდაცვის სერვისების ხელმისაწვდომობასა და ხარისხს. პრევენციული პროგრამებით, სახელმწიფო უზრუნველყოფს ნარკოტიკების უკანონო მოხმარებაში ადამიანების, განსაკუთრებით - ახალგაზრდების ჩაბმის თავიდან არიდებას.

ქართული ოცნების პროგრამის სოციალური დაცვის ნაწილი ასევე ეხება დაგროვებითი საპენსიო სისტემის მოდელის დანერგვასაც:

"დაგროვებითი სისტემა გულისხმობს თანადაფინანსებას დასაქმებულის, დამსაქმებლისა და სახელმწიფო ბიუჯეტის მხრიდან".

ქართული ოცნების საარჩევნო პროგრამით, დაინერგება სახელმწიფო პროგრამა - ცხოვრება გრძელდება.

"პროგრამის ფარგლებში კერძო კომპანიები წახალისდებიან საპენსიო ასაკის კვალიფიციური პირების დასაქმებისათვის".

დევნილთა დახმარების პროგრამის ფარგლებში, ქართული ოცნება ამომრჩეველს ჰპირდება, რომ სახელმწიფო 2000-მდე ბინას შეისყიდის მენაშენეებისგან თბილისსა და სხვა დიდ ქალაქებში. სოფლად სახლის პროექტის ფარგლებში კი, სულ მცირე 3000 დევნილ ოჯახს გადაეცემა საცხოვრებელი სახლი.

პარტია ასევე აცხადებს, რომ გაგრძელდება კერძო მესაკუთრეებისგან იმ საცხოვრებელი ფართების გამოსყიდვა, რომლებიც დევნილებს აქვთ დაკავებული.

ქართული ოცნება გამარჯვების შემთხვევაში, ეკომიგრანტებსაც ჰპირდება დახმარებას. მათი განცხადებით, გაგრძელდება ეკომიგრანტი ოჯახებისთვის საცხოვრებელი სახლებისა და მიწის ნაკვეთების დაკანონების პროცესი:

"დაგეგმილია ქვეყნის მასშტაბით 1000-მდე ეკომიგრანტი ოჯახისთვის სახლების შეძენა".

დასაქმების გასაუმჯობესებლად, მმართველი პარტია აცხადებს, რომ მათი ხელისუფლებაში მოსვლის შემთხვევაში, ისინი შრომის ბაზრას დეტალურად გამოიკვლევენ და დახმარებას გაუწევენ სამუშაოს მაძიებლებს პროფესიის არჩევის, მომზადებისა და გადამზადების კუთხით.