პაატა ბურჭულაძის ბლოკის მიერ წარდგენილ საარჩევნო სიაში ვერ მოხვდა გუნდის ერთ-ერთი მთავარი სახე, ხათუნა ლაგაზიძე, რომელმაც On.ge-სთან საუბარში საარჩევნო სუბიექტის დატოვების მიზეზებზე ისაუბრა.

როგორც ლაგაზიძემ განგვიცხადა, როდესაც ბურჭულაძის პარტია გირჩის კოალიციასთან გაერთიანდა, გუნდის შიგნით საუბრობდნენ, რომ ამ ნაბიჯის გადადგმა გახდა საჭირო იმისთვის, რომ პარტიას ფინანსური კრიზისი ჰქონდა. თუმცა, ლაგაზიძე განმარტავს, რომ აღნიშნული სიმართლეს არ შეესაბამება:

"იმ დღიდან, როდესაც გავერთიანდით გირჩთან, არცერთი კომენტარი არ გამიკეთებია მედიით, რადგან სანამ საბოლოოდ არ გაირკვეოდა სიის კონფიგურაცია, არანაირი სურვილი არ მქონდა მათთან [ახალადშექმნილ ბლოკთან] ასოცირების. მე იმედი მქონდა და ყველაფერს ვაკეთებდით პარტიაში იმისთვის, რომ ეს შეერთება გამოგვეყენებინა პარტიის გადარჩენისთვის და პარიტეტულ საწყისებზე მაინც ყოფილიყო სია დაკომპლექტებული. ასეთ შემთხვევაში, კიდევ დავუჯერებდით ბურჭულაძეს, რომ ეს ნაბიჯი პარტიის გადარჩენისთვის გადადგა. რეალურად მან ეს ნაბიჯი მხოლოდ საკუთარი გამორჩენისთვის გადადგა, რადგან პირველ 12 კაცში მისი მხოლოდ 3 ადამიანია. ეს იყო მხოლოდ და მხოლოდ მისი პირადი ინტერესებიდან გადადგმული ნაბიჯი და ამის დასტური არის მისი საპარლამენტო სია".

ლაგაზიძემ განმარტა, რომ ის სიას დაელოდა იმიტომ, რომ დღეს თამამად ეთქვა ბურჭულაძისთვის, რომ ის არის გამყიდველი და არა მისი გუნდის წევრები:

"ერთი, როდესაც ეს გაერთიანება შედგა და ბევრმა ადამიანმა დატოვა პარტია, იმის მაგივრად, რომ ბურჭულაძეს ჰქონოდა მცდელობა მთელი საქართველოს მოსახლეობისთვის აეხსნა, რა გახდა ამის მიზეზი და ეთხოვა გვერდში დგომა, მან პირიქით, რამდენიმე ეთერით განაცხადა, რომ ვისაც უნდა წავიდეს იმიტომ, რომ ესენი ჩანერგილები იყვნენო. აქიდან გამომდინარე, ჩემს წამოსვლას ის ამ დროს გამოაცხადებდა, ღალატად. როცა მე მას ღიად შემიძლია ვუთხრა, რომ მას გუნდი კი არ ჰყავდა მოღალატე, გუნდი კი არ მიატოვა, მან უღალატა გუნდს და გაყიდა საკუთარი გუნდი. ბლოკში გაერთიანება კი არის პირობითი".

მისი თქმით, დასტური იმისა, რომ ბურჭულაძის ეს ნაბიჯი პარტიის გადარჩენას კი არ ემსახურებოდა, პარტიის გაყიდვას ემსახურებოდა, არის მისი სია.

ჩვენს შეკითხვას, რა არის ბურჭულაძის პირადი ინტერესი და ვის მიყიდა ბურჭულაძემ პარტია, ლაგაზიძემ უპასუხა, რომ ეს ნამდვილად არ არის პოლიტიკური ინტერესი, ხოლო ჩვენს შეკითხვაზე პასუხი ბურჭულაძის ბლოკის სიაშია:

"მან გაყიდა პარტია საკუთარი ინტერესებისთვის. მან მიყიდა თავისი პარტია მათ, ვისითაც დღეს მისი სიაა დაკომპლექტებული".

ბურჭულაძის ბლოკი საარჩევნო სიის პირველი 12 წევრი კი ასე გამოიყურება:

  • პაატა ბურჭულაძე
  • გიორგი ვაშაძე
  • დავით ჯანდიერი
  • ვახტანგ მეგრელიშვილი
  • ირაკლი ყიფიანი
  • იაგო ხვიჩია
  • დავით კიზირია
  • გიორგი მელაძე
  • მევლუდ ხეშერაშვილი
  • მამუკა კაციტაძე
  • გიორგი პაპავა
  • ზურაბ კაფარიძე