პარლამენტის ბიუროს სხდომა, რომელზეც თიბისი ბანკის საქმე განიხილეს ურთიერთბრალდებების ფონზე მიმდინარეობდა. ნაციონალური მოძრაობის დეპუტატმა, რომან გოცირიძემ განაცხადა, რომ თიბისის საქმის სასამართლო პროცესი იყო ქურდული გარჩევა, რომელიც "ივანიშვილის შუშის სასახლეში" გაიმართა. მისივე თქმით, ეროვნული ბანკი გადაიქცა შინაგან საქმეთა სამინისტროს ქვესტრუქტურად.

პასუხად უმრავლესობის დეპუტატმა, გია ვოლსკიმ ნაციონალური მოძრაობა სადისტებად მოიხსენია და განაცხადა, რომ არ შეიძლება ყველაფერი მათ პოლიტიკურ ინტერესებს მოარგონ, როცა სახელმწიფო ინტერესიც არსეობს.

"ქურდული გარჩევაც თქვენ მხარეს მოიკითხეთ, სადისტობაც თქვენს მხარეს მოიკითხეთ, არაკომპეტენტურობა და თავგასულობაც", — განაცხადა ვოსლკიმ.

დღეს, 21 თებერვალს თიბისი ბანკის სამეთვალყურეო საბჭოს თავმჯდომარემ, მამუკა ხაზარაძემ და ბადრი ჯაფარიძემ თანამდებობები დატოვეს. თიბისი ბანკში განაცხადეს, რომ წყვეტენ სასამართლო დავებს ეროვნული ბანკის წინააღმდეგ და დაკისრებულ მილიონიან ჯარიმას გადაიხდიან.

ეროვნული ბანკში განაცხადეს, რომ მიესალმებიან ხაზარაძის წასვლას. მათ თქმით, ეს დადებითად აისახება ბანკის გამჭირვალობაზე. მათივე თქმით, თიბისი ბანკი ძლიერი და მდგრადი საკრედიტო ინსტიტუტია და სრულად აკმაყოფილებს ეროვნული ბანკის მიერ დაწესებულ ეკონომიკურ ნორმატივებსა და ლიმიტებს.

თიბისი ბანკის საქმე

8 იანვარს გავრცელდა ინფორმაცია, რომ პროკურატურამ თიბისი ბანკიდან დოკუმენტები ამოიღო. მაშინ პროკურატურამ განმარტა, რომ თიბისი ბანკის 2008 წლის აქტივობები შეიცავდა ფულის გათეთრების ნიშნებს და მასში თიბისის დამფუძნებლები და ამავდროულად სამეთვალყურეო საბჭოს თავმჯდომარე, მამუკა ხაზარაძე და მისი მოადგილე ბარი ჯაფარიძე ფიგურირებდნენ.

ამ საქმესთან დაკავშირებით 13 თებერვალს საქართველოს ეროვნულმა ბანკმა მათი ხელმძღვანელი თანამდებობიდან გადაყენება მოითხოვა. თიბისი ბანკში ამბობდნენ, რომ აპირებენ სამართლებრივი საშუალებები გამოიყენონ ბანკისა და აქციონერების ინტერესების დასაცავად.

რამდენიმე დღის წინ გამართულ პრესკონფერენციაზე მამუკა ხაზარაძემ თქვა, რომ დაწყებული გამოძიება ანაკლიის პორტის მშენებლობას საფრთხის ქვეშ აყენებს.