ტელეკომპანია რუსთავი 2-ის გენერალურმა დირექტორმა ნიკა გვარამიამ 8 სექტემბერს გამართულ ბრიფინგზე განაცხადა, რომ რუსთავი 2-ის საქმის განმხილველი მოსამართლეები საკუთარ პოზიციაში ჩამოყალიბებულები არიან, თუმცა მათზე ზეწოლა მიმდინარეობს:

"ჩვენი ინფორმაციით, მათზე მიმდინარეობს უმძიმესი ზეწოლა, საქართველოს ხელისუფლების მხრიდან. ამ ზეწოლაში მონაწილეობას იღებენ უშუალოდ უზენაეს სასამართლოში წარმოდგენილი თანამდებობის პირები, ასევე ჩვენი საქმის განმხილველ მოსამართლეებზე ზეწოლა მიმდინარეობს გარედან. სახელმწიფო ხელისუფლების ორგანოების მხრიდან და ამაში ჩართულია უსაფრთხოების სამსახურებიც"

გვარამია ასევე ასახელებს იმ პირების ვინაობას, ვინც მისი ინფორმაციით, ზეწოლას ახდენს მოსამართლეებზე:

"მე მინდა გამოვააშკარავო ის ადამიანი, რომელიც ასრულებს ხელისუფლების უმძიმეს დაკვეთებს. მეორე ინსტანციაში ეს იყო ვალერი ცერცვაძე, რომელმაც პრაქტიკულად მიიღო გადაწყვეტილება ჩვენს საქმეზე. უზენაეს სასამართლოში ხელისუფლების დაკვეთების შემსრულებელია მიხეილ ჩინჩალაძე, რომელიც არის უზენაეს სასამართლოს თავმჯდომარის მოადგილე. იგი ნაციონალური მოძრაობის დროს იყო სახელმწიფოს წარმომადგენელი. გულდაწყვეტით უნდა ვთქვა, რომ ბატონი ცერცვაძე და ბატონი ჩინჩალაძე ხელისუფლებას წარმოადგენდნენ მაშინაც, სამწუხაროდ სასამართლო ხელისუფლებისგან მაშინ არ იყო დამოუკიდებელი".